主頁, 動漫資訊, 潮玩新聞 — 18/05/2012 at 12:00 pm

《溫瑞安群俠傳》創刊!誰是天下第七?

by

《溫瑞安群俠傳》創刊號$15

千呼萬喚始出來,改編自溫瑞安小說嘅《溫瑞安群俠傳》終於喺擒日見街,望穿秋水,終於等到關七爺爺再次出山,我心情真係好好好好好好十億個好興奮。

話我誇張?話我賣廣告?一,實話實說我懶理你感受,同我一樣都係真金白銀自掏腰包支持港漫嘅忠心Fans,一定會明白我心情;二,好嘢又怕乜賣廣告,咁司徒劍橋手畫係精雕細琢呀,咁溫瑞安小說係扣人心弦呀,未睇過原著小說只證明你識字有限,唔該讀多兩年書,唔好無的放矢,永遠只懂得上網偷睇漫畫而又好發議論者唔該收皮,因為你偷睇呀,偷嘢個偷呀,你係賊呀,賊無資格開聲架。

發洩完,入番正題,上回《群俠傳》以關七穿越時空飛到現代終結,今回《溫瑞安群俠傳》一如所料,先交代關七又從現代返番去南宋高宗年間,如果唔係邊有戲做呀?出乎以料嘅係曾經想將迷天盟連根拔起嘅追命居然唔認得佢,究竟關七有無曾經存在過呢? 另一條伏線講殺手之王唐斬一出場就俾人斬,仲要一係唔斬,一斬就畀人斬開十九幾碌,十頁,我認真數過,唐斬講唔夠廿句對白就慘遭分屍,而殺佢嘅人,係一個自稱「第七」嘅年輕人。喂?大家都有個「七」字,究竟呢個第七係乜水?同關七爺爺又有乜關係?呢本書大玩時空交錯,唔係話我知第七就係少年版關七呀,我嬲架!

 

真係操你娘,追命居然唔認得關七。

 

第七造型鬼頭鬼相,一出手就怒殺唐斬。