fbpx
Android, 主頁, 手機/電腦 — 08/08/2013 at 3:58 pm

LG G2美國發佈! 靚聽24-bit/192kHz 靚拍自動Close Up追臉Shot

by

TF20130808_01P

LG新一代最強G2, 喺美國紐約Jazz at Lincoin Center噚晚正式發佈! 作為新一代機王級手機, 5.2″ Full HD大芒、Snapdragon 800 2.26GHz四核心處理器, 再配2GB LPDDR3 800MHz記憶體, LG已將硬件規格練盡最強! 不過更吸引係佢個拍片功能! 一個叫TRACKING ZOOM, 可以用一個主鏡頭拍「畫中畫」, 一邊影大圍片、一邊追人頭影Close Up! 另一個叫ZOOM TO TRACK, 功用係玩影片後期製作, 佢可以將Wide Shot變為Close Up, 將平淡片段變為追住臉部影嘅走動Shot, 再加靚聽24-bit/192kHz音效檔案, 絕對係聲畫雙絕!

 

講到全機第一焦點位, 一定係機背嗰個將開關鍵同音量按鍵, 合二為一放機背的大掣! LG嗰邊講, 其它手機都會有上下左右好多唔同擺法, 不過對喜用左手或右手嘅人, 都有一半可能性覺得唔多就手, 依家放喺機背置中, 係唯一可以方便晒所有人嘅設計, 而且呢個掣仲有Screen CaptureQuickmemo同相機快捷鍵等附帶功能, 可以話玩法多多、非常貼心!

新機另一大亮眼點, 係佢個5.2″大屏幕, Full HD 1,920 X 1080絕對係走唔甩, 最正係兩邊邊框位做到只有2.65mm超幼, 雖然個芒尺寸唔講得好巨型, 不過機面覆蓋率達75.9%, 真心! 望落去第一眼感覺, 係會比實際尺寸大架! 而且機身只有9.1mmSlim, 我覺得佢係為咗方便放入衫袋、褲袋先會揀呢個尺寸! 而且屏幕顏色同細緻度亦非常高, 據知紐約記者會現場, 仲有專用高倍數放大鏡俾你放大啲Pixel, 老實! 423ppi真係好緊密, 放大鏡、放大睇! 都唔太覺Pixels間空位囉!

相機功能, G2都進一步加強! 1,300萬像素鏡頭, 睇數字冇乜驚喜! 但係話你知, 佢竟然有光學防震技術又點睇呢!? 以手機界别, 佢絕對係「奇行種」! Full HD影片更可達60fps, 由此睇得出手機處理能力真係非常高!

不過講到我嘅最愛, 反而係佢拍片嘅軟件功能, 首先係抄抄哋嘅前後鏡齊齊拍「DUAL RECORDING/CAMERA」一定走唔甩先! 另一個較新係叫TRACKING ZOOM, 佢就係喺你拍片時, 係拍攝畫面之上, 有一個「畫中畫」相框! 而呢個相框會追住你所指定的Framing, 自動追焦拍片! 如果用簡單案例, 就係你喺生日會拍67人大圍片時, 只要你將個畫中畫Framing位指定壽星公, 那麼不管你部手機鏡頭如何移動, 個「畫中畫」都會有壽星公大特寫, 其實真係幾好用!

另一個我勁鍾意嘅, 一樣同拍片有關! 呢個叫ZOOM TO TRACK! 呢個就堅喇! 就係拍完片之後, 幫你再整後期製作、CLOSE UP追人頭! ! 又案件重演, 例如你用手機拍一個演唱會, 雖然你坐得好前排, 不過都只係拍到全身片啫! 拍完之後, 你只要指定歌手的面部為重心, 再設定你要CROP周邊相框範圍有幾大, 之後你再播返同一條片! 你會發現佢會由原本嘅大環境片段, 變成好似MV一樣, 攞個鏡頭追住個歌手面部CLOSE UP周圍走一樣, 歌手臉部永遠在畫面正中, 而周圍環境會喺咁郁動, 馬上由一條悶蛋業餘電影, 變為一定充滿動感MV, 從此要做拍片大師, 就係咁簡單!

有靚畫又點可以冇靚聲呢? G2另一大驚喜點, 就係佢可以對應發燒級24-bit/192kHz音效檔案, 需知現時一般手機大多只對應16-bit/44kHz! 而且現時市面一般發燒級、聽到24-bit/192kHz的流動音樂播放器, 都要上67千蚊價位起跳, 依家連手機都玩到, 你話係咪好正先!? 由於佢嘅聲畫功能都去到咁盡, 所以電池容量都會起用較大號嘅, 暫知係行3,000mAh, 會唔會仲有加大碼版, 唔使啦! 玩智能手機加尿袋, 這是常識吧!

另一個賣小聰明、但又幾實用嘅! 我真心幾推介個KnockON功能! 一般人用ANDROID手機都會落KEYLOCK, 但有冇試過唔見手機先? 如果人哋執到你部手機, 但開唔到入主介面, 咁又叫人點搵你先? 呢個KnockON, 只要你敲兩吓部手機, 佢就可以開着你部手機, 不過就會進入一個Guest Mode模式! 喺呢個模式下, 訪客只可以使用你所開放嘅手機功能, 例如你可以俾佢打出打入電話, 或開啟某幾個指定Apps, 更甚者連主介面都可以完全指定、同正常Mode完全兩回事, 如果家有少朋友喜歡攞你部手機嚟打機, 又或者老婆間唔中喜歡開你部機嚟睇, 但你又唔想佢開到你嘅相簿……咁就啱喇! 敲部機兩吓入Guest Mode!

預計G2會喺今年第三至四季, 喺香港正式見街! 其實依家已經踏入第三季, 所以估計好快有得賣, 不過機價暫時未定!

 

TF20130808_02P TF20130808_03P TF20130808_04P TF20130808_05P TF20130808_06P TF20130808_07P TF20130808_08P TF20130808_09P

http://www.lg.com/global/g2