fbpx
主頁, 動漫資訊, 潮玩新聞 — 07/08/2013 at 6:22 pm

《魔動天下》畫功出色 橋段紊亂

by
《魔動天下》$38

《魔動天下》$38

擒晚經過樓下書報攤,忽然見到呢本《魔動天下》,即問老闆娘乜料,佢話:「上個禮拜出版架嘞,十本八本全部賣晒,發行見幾好賣,咪拎多一水書返嚟賣囉。」成三十八蚊一本喎,真係咁好賣?

老闆娘繼續話:「之但係新一水書擺咗幾日,都未發過市喎。」咁即係點呀?「我點知點呀,即係你係第一個買囉。」咁即係好賣定唔好賣呢?無從深究嘞。講番本書,封面好日本風,唔知仲以為係日漫,搵來搵去都見唔到作者名,揭到封底先知作者叫張偉傑。畫功方面,線條精雕細琢,每一格都花咗好多心機,絕無話揸流灘,分鏡亦一流,無話格格都係主角大頭講對白咁沉悶,可惜係黑白稿,如果係彩色就更加Good。

畫功得,但故事就認真麻麻,大橋都係神神佛佛妖魔鬼怪,甚麼魔都人、異人、異能、骷髏人、戰狼、寶劍、乜石物石,連啲貓貓狗狗都識講人話,亂七八糟炒埋一碟。唔係吹水,我已經好畀心機去睇,但睇咗兩次都唔知古仔講乜,只係勉強分到忠奸角。總括,《魔動天下》我畀50分,僅僅合格,仍須努力加油。