fbpx
編輯Blog — 05/08/2013 at 9:00 am

【編輯Blog】苦茶:SB28飲醉酒死了! 我嘅第一支燈呀!

by

TF20130804_99

 

用咗10幾年嘅SB28終於死咗! 真係好傷心……由我學影相佢跟到我依家, 估唔到係死喺奸人之手, 嗚嗚嗚嗚嗚!

話說有一晚, 老死勁吹自己千杯不醉, 我哋為咗送佢一程, 就用1:1份量幫佢開芝華士溝綠茶, 佢仲要飲唔出嗰吓先抵死嘛! 一Jar過後, 我哋就擊倒進擊之巨人, 嗰吓你話我開心到呢!

馬上幫佢裝香、點煙, 仲要偷埋神櫃地主杯裝酒佢飲, 你都唔知嗰晚全場人玩得幾開心! 留意呀! 係全場呀! 你話呢條粉腸平時得罪人幾多呢!

呢啲咁開心嘅時光, 你話點可以唔影相呢! 不過可能環境太黑, 搞到支閃燈吓吓要Full Power出, 到第二日再影相, 就發現佢燒咗膽喇! 哎! 有人會話係樂極生悲, 但我就覺得成件事係一個局, 跟本就係引人去影嘅, 呢啲人真係立心不良!

冇法啦! 惟有買過支啦! 其實我一向都係喜歡用手動校, 可能一直用Prosumer機關係啦! 而且影Products嘢多、唔急嘛; 原本諗住買國產燈, 平平哋算, 不過攝記老死介紹咗支phottix mitros閃光燈, 嘩! 有成GN58、有TTL(Canon同Nikon)、有Slave, 仲要回電快到冇朋友, 感覺係快過Nikon原廠添! 開價$1,980, Nikon嗰支都要二到尾啦! 最開心係準嗰吓抵死嘛!

你以為咁就完!? 喺星際買時仲發現有嘢送, 190cm燈腳連頭、白遮, 同超厚墊燈腳袋, 喂! 仲大過兼厚過好多氣槍袋喎! 如果最近想買燈, 真係非常諗得過!

不過好事始終係多磨嘅, 可能真係太好用關係, 原本諗住一雞兩食, 需知我老婆一向用Nikon, 間唔中可以借佢用吓咁啦! 點知一借就冇得返轉頭……正所謂暴龍哥話齋, 你X過就返唔到轉頭!

咁即係要買過支啦! 哎! 諗諗吓都係算喇! 自己都係買支國產貨好喇, 點知阿大人會唔會話想學用雙燈影相架! 到時我咪多多錢都搞唔掂!