fbpx
Online Game, 主頁, 遊戲新聞 — 16/05/2012 at 12:54 am

阿媽! 我買咗Disable III

by

苦茶經過噚晚地獄購物旅行團之後,一心諗住可以苦盡甘來、早買早享受,點之發現錯手買入Disable III,雖然母親節過咗,但係忽然好掛念某某的娘親……

好老實!噚晚估計有40℃嘅排隊熱氣,到朝早度火都仲未熄,鼻哥窿仲有陣唔知自己定隔籬嘅臭汗味;Fine!等咗12年、有機打,我唔同你「根根」計較!

點知一開Game就彈出「Error 33」!即係點?未開Server是也!苦也!死等爛等,午後三點幾終於入到亞服,你班牛鬼蛇神仲唔死!

初步試玩感(只玩到Act1中段),感覺真係好懷古;頭排出城係荒野,捐樹窿、捐古堡打怪,最後搵到個墳地,同D II可謂異曲同工,故仔橋段完全一樣,好明顯係想喚起大家童年回憶。

畫面靚唔靚?

畫面靚唔靚?苦茶答你唔到!因為我係用一部i3文書Notebook玩!我知大家想問候我,不過真係12年都無打PC Game衝動了,對一個晚晚只有打稿都「唔想動」嘅人,唔用文書Notebook又用乜先?

打得興起!「暗黑女神」打嚟話要開飯,因利成便約佢落深水埗,順手踩落場問黃金老死Sales:「其實……行i3都無問題嘅,DIII對CPU要求唔高……不過最好加張ATi 7770或GeForce560!」我嗰刻見到佢陰陰笑!你條粉蛋,當日係你叫我買文書Notebook嘅,佢加到顯示卡咩?我問:「即係幾錢?」「4千頭、一個鐘頭內砌起!」呢啲咪生意囉!不過估唔到老夫子橋段,禍不單行會發生喺我身上。

Error37、Error3003

睇到呢個標題,有開Game都知乜事!細佬裝埋個OS、近十二點諗住再覆桌,點知就出現Error37字樣,即係乜?Server人數達上限、再入多兩次,仲惡搞埋Error3003──「Server關閉」!

喂!你知唔知買頭批嘅人,好多人排咗成1日?你知唔知黃金地庫條龍,400、500両友排到出地面、打晒蛇餅,仲要係個個有單有據、俾埋訂、等攞貨都要等三、四粒鐘呀?你知唔知自己出咗幾多貨?你又知唔知Server嘅承受能力,你知唔知俾射燈晒咗四粒鐘嘅人有幾好火氣呀?

 

時間: 2012-05-15 23.56.24

 

時間: 2012-05-15 23.57.08, 真係GAME OVER 鳥!