好耐未試過有套日劇令我睇完一集就想睇埋第二集，睇完第三集就心諗冇嗱？唔係《衝上雲霄》，雖然我覺得吳鎮宇都仲係好有型，啲劇情都唔太膠，但都係咁啱喺電視前就睇，有稿打就開嚟聽。而呢套劇竟然唔係我期待嘅《Summer Nude》，而係《半沢直樹》，男主角成日咪住個嘴，呢種獨特演繹方法，又幾有型。
其實套嘢睇落有啲位我都會笑，即係日落日出有旁白嗰啲位，仲有出劇名嗰吓，直情係無綫早年啲台慶劇咁，即係《創世紀》、《天地男兒》、《笑看風雲》嗰隻。而且我份人記仇，最鍾意就係有仇必報，男主角嗰句一定要對搞佢嘅人以牙還牙十倍奉還，型到核爆。仲有，國稅局條友我覺得好熟口面，諗咗好耐，我懷疑佢係鄧一君。
如果你鍾意睇無綫啲陳年台慶劇，我諗呢套應該啱睇，雖然裏頭啲演員全部都over咗。我睇吓睇吓，好自然喺度諗，如果無綫拍嘅話，邊個可以做男主角？黎耀祥幫你慳多啲，喺年齡層面睇都OK，但台型好似爭少少；不如都係林峯做啦，但佢啲表情一定做唔到嗰份由內到外再入番內嗰隻。所以，我諗不如搵張家輝啦，但就嘥咗佢啲腹肌囉。同埋我覺得呢啲劇係一定要有鄭少秋。
落咗幾個星期雨，教練，我好想打籃球呀。
嚟緊星期尾，有朋自遠方來，自細陪住佢大嘅小朋友嚟我度寄宿，佢成身毛好得意，到時影啲靚相分享俾大家。