fbpx
編輯Blog — 30/07/2013 at 5:06 pm

【苦茶Blog】今次要飲苦茶喇!

by

GGG

 

呢世人最怕係乜? 係咳! 真係好長氣, 醫極唔好, 今次重要發埋燒, 完全失去作戰能力! 我頂!

真係唔明, 以為天氣凍先咳, 依家熱到30幾度先嚟咳, 我只可以講句時代富貴咗, 而咳呢個病都富貴咗!

咳嘅極限係乜? 每咳一吓個肺好似就嚟爆一樣, 尾後感仲有種火燒嘅感覺, 而喉頭嚿痰, 係郁都唔郁嗰隻, 代表咗喉嚨會繼續痕, 即係仲有排你咳, 再嗅着喉頭點點血腥味, 醫生、醫生! 唔咳得唔得呀?

醫生話得! 佢俾咗一包十幾種藥我, 話食咗即刻止咳, 不過會有嚴重昏睡傾、手震腳震, 老實! 咳咗成晚冇得瞓, 聽到有咁好藥效, 簡直當佢係至寶三鞭丸啦! 唔使講嘢、買支水即食!

唔使兩個街口, 馬上師傅到! 真係手腳有啲震, 但真係唔多咳, 但最弊係成身好似有種軟晒嘅感覺, 最後記憶係「打的」返屋企, 仲要老婆落下接嗰隻! 估唔到依家啲藥, 真係可以咁犀利!

跟手幾日在病床, 不過到咗病尾又有另一個問題……就係清唔到啲痰! ! 西藥係快好, 不過最後一督痰, 係永遠清唔到嘅, 甚麼橙粉、喉糖、咳藥水都係廢話! 但如果由得佢, 咳吓咳吓再發炎, 你又會翻咳過, 所以一定要清!

呢段時間真係要做神農嚐百草! 漁夫之佬? 講你聽, 頭十零粒係舒服嘅, 之後? 嚿痰會滑膩膩喺喉頭度轉嚟轉去, 如果再食落去, 仲會越食越痕, 咳鬼死你!

八仙果? 真係睇品質, 優之良銀出品係下下之選, 完全冇料到! 金風? 唔錯! 不過佢為咗就嗰浸「果」味唔太濃, 所以功效硬係爭啲爭啲! 最後聽老死講, 去沙田排頭街車仔涼果檔買, 真係唔錯, 食落相當舒服, 真係止到咳!

不過有一樣要留意, 話說呢個時候, 有啲人鍾意食薑! 其實係幾搵命搏, 話說有一次我就係用薑清啖尾, 最後就發展成熱咳, 即係眼、鼻、嘴、喉都好燢好燢, 但又唔吹得風嗰隻! 呢種辛苦法, 真係完全不人道!

到最後究竟清唔清到嚿痰? 當然係清唔到啦! 所以到依家都係流住兩行鼻水、頭重重打呢份稿, 身側是一碗中藥, 醫師話起碼食多三劑先清到個底。

記得細路仔時, 留住兩行鼻涕, 幾日就不藥而癒, 依家病咗成個星期, 西醫中醫混合療法, 都係辛苦得死去活來……一口飲下, 碗嘢完全冇乜味, 只係覺得個胃有啲反反哋, 我估三劑係幾保守估計, 點解依家啲咳, 越嚟越手尾長, 醫極都唔斷尾?

Tags