Mobile games, 手機/電腦 — 30/07/2013 at 1:37 pm

免費手機遊戲隨街挑機懶人必玩大話骰

我最怕猜十五二十，返工仲未夠攰咩，仲要郁手郁腳，要玩就玩兵器—骰盅。玩大話骰講技術，飲酒交學費在所難免，不過o依家就算唔飲酒都可以閉關修練。呢隻nxTomo研發嘅《大話王 Liar’s Inn》，推出5日就打入香港App Store免費排行榜第2位，就係因為玩法簡單，唔駛用骰盅，篤吓部手機就玩得，仲可以隨街搜尋附近玩家挑機完成任務贏籌碼。玩得大話骰，最重要講大話，遊戲入面都有唔同嘅表情符號同對白俾你善用，眨唔眨眼冇人知。