呢兩個星期都好似音樂碟玩晒, 上星期有學友隻DVD(個亞加力膠BOX SET真係好鬼型!), 今個星期就有Big Four! 安仔、蘇永康、梁漢文、張偉健, 佢哋嘅歌正係我嘅「那些年」, $200, 真係抵到冇朋友!
港產重頭片係《聖誕玫瑰》, 楊采妮首次做導演, 仲係佢最在行嘅法庭戲, 應該唔會差得去邊, 仲要有城城雙天補至尊, 可以一睇嘅, 不過反而驚太沉重!
《CAT.8 絕地天劫》同《EVIL DEAD》, 天災、動作、喪屍, 鬼佬片呢科嘢冇得輸, 不過反而想介紹吓尚格雲頓嘅《終極標靶》同《突然死亡》, 都係唔錯嘅舊戲, 其中嘅《終》都可以話係佢上位其中一套幾重要嘅戲……不過講開又講吖, 呢期係咁出佢嘅舊片, 仲要係個個星期都有頻密, 唔講我仲以為係佢死鬼咗添, 喪出回顧影碟! 經典片仲有《現代啟示錄》, 睇前要有心理準備!
DVD嗰邊大家可能冇乜留意, 其實翻出了《五個相撲的少年》、《五個光頭的少年》同《談談情、跳跳舞》……老實! 日本動畫電影真係無敵, 真人片就係九流中嘅九流! 呢三套都可以話係我最鐘意嘅日系真人電影, 好笑、開心、小品、簡單明快, 真係相當高評價, 其實仲有一套《禮儀師的奏鳴曲》都相當正, 如果是有經歷的人, 睇完會感到深深的心靈解放, 幾值得搵嚟睇!
DVD Pro（2332 6326） 地址: 旺角奶路臣街 6E德發商場地庫B4舖 營業時間 : 1:00pm-10:00pm（公眾假期照常）
DVD
