擒日動漫節，身邊不乏阿爸阿媽拖住十歲八歲子女一家大小進場，而我，已不下三次聽到啲父母對奇裝異服嘅Cosplayer指指點點。
有父母昂高頭，專登對住班Cosplayer擺副不屑嘴臉，有子女想同Cosplayer合照但被父母阻止，「著到鬼五馬六。」「啲女仔露晒肉，都唔知想點。」「無厘正經。」父母們嘅批評說話，非隻隻字十足十抄錄，但大致如此。我想講嘅係，家陣呢度係動漫節呀，唔係年宵市場，有Cosplayer出現有幾出奇？角色扮演係動漫文化之一，人哋開開心心影吓相玩番三兩日，又唔係吸毒索K，點解要戴有色眼鏡歧視人呢？我甚至可以話，無咗呢班Cosplayer的話，成個動漫節肯定失色不少，話人露肉？角色需要嘛，衰得書展嗰班擺明捧對奶對住鏡頭嘅嫩模？所以呢，我要多謝以下幫忙影相嘅Cosplayer，不枉我戙企會場三粒幾鐘，排名不分先後，大家慢慢欣賞啦。
