天下攤位有大大個步驚雲展板，把絕世好劍都好搶眼吓。
馬Sir完結《風雲》，連報紙都大肆報導，或者因為咁，今年天下推出嘅動漫節精品，特別受Fans歡迎，攤位長期出現人龍。
天下聯乘pull-in出產嘅風雲老底、風雲紀念Tee、風雲紅金特別版筷子、風雲白色紀念版雨傘，就正正擺喺攤位門口最大嗰個飾櫃，攤位有咁多人排隊，斷估都係為咗呢批精品，搞到要出動保安截龍，等Fans分批入場。精品賣晒未？我有問職員架，但佢哋好忙，求其衍敷咗兩句就無理我。放眼所見，除一戙戙日漫放晒喺書架供人購買之外，當中又以黃水斌畫集《Fruitpunch》比較受歡迎，畫集分普通版同Boxset豪華版，前者隨書附送黃水斌廿年前入行作品《誕生》全新鉛筆繪本，賣$128；後者限量100套，比普通版多件Tee，盛惠$288，我遊咗攤位唔夠十分鐘，已經有兩位Fans買咗。
唔係吹水，真係勁多人排隊。
天下代理好多日本少女漫畫，衍生而出嘅大小精品，好受港女歡迎。
黃水斌《Fruitpunch》Boxset豪華版$288
黃水斌《Fruitpunch》普通版$128