時代廣場「GUNDAM DOCKS AT HONG KONG」今日剪綵正式開張! 仲請咗黃宗澤同吳千語開光, 點解係佢哋……係呢! 點解呢呵? 不過有明星睇, 大家應該冇異議嘅; 但討論焦點反而係隻馬莎, 呢位西人真係完全冇霸氣, 而且我仲隱隱若若聞到佢有陣果皮味; 馬茜OK! 可惜條褲同件衫唔夠緊, 少咗啲原著風味; 布拉度……算把啦! 阿寶有啲神緒, 黑黑哋又_ _哋, 下次開戲搵你呀!
開完皮、大家影夠相, 好多人都急急腳走人, 哪! 咁就瀨嘢喇! 平台位個GUNDAM MARKET唔知係接錯Order定甚麼、甚麼, 好多限定版香港模型同產品竟然即時偷步開賣! 最令人心驚嘅, 係「GUNDAM DOCKS AT HONG KONG」RG版RX-78-2同紅彗星竟然照賣, 喂! 一般路邊社消息係話26號先賣得, 搞到好多人都話失晒預算, 你知啦! 聽朝又話動漫節, 你話幾咁兩邊不是人呢!
我又俾少少貼士大家, 好多人可能會心諗, 動漫度會唔會有得賣呢? 暫知答案係唔會, 細路剛剛偷入了動漫展, 我見笨大賣模型個攤位, 完全唔見有「GUNDAM DOCKS AT HONG KONG」版模型, 係連海報都冇張嗰隻! 嗱! 做人嘅嘢, 早啲揸定主意好呀!
同步特別版模型仲有GUNDAM FRONT TOKYO版STRIKE FREEDOM, 堅唔貴, $160值得買埋, 留意收銀櫃位左手邊, 仲有「GUNDAM DOCKS AT HONG KONG」嘅香港特別版TEE三件($200/EACH)、CLEAR FOLDER($20)同明信片($20), 如果你真係咁愛香港……
另外, GUNDAM MARKET對開, 仲有個小型GUNDAM模型展, 最新RG版GP01同GP01FB都有成品, 不過呢個當然唔係重點啦! 重點係MG版RX-78 VER.3.0都有展出, 仲係全開甲, 見佢只要加幾條膠管就可以變成展示模式, 全部甲撐開晒, 真心好精美, 加埋DISPLAY櫃個頂光, 真係正到冇朋友, 死啦! 想買添, 但我已經係第幾隻RX-78呢!?
至於反高潮位, 當然係GUNDAM BUILDERS啦! 有兩架飛機同兩架機械人, 留意! 我唔會叫佢做MS嘅!
另外好多人關心嘅木馬號, 對唔住, 係未飛到嚟嘅! 預計係8月2號, 唔該大家唔好再放流料話見到見到, 0依家手機影相咁方便, 見相為實呀!
詳