fbpx
編輯Blog — 24/07/2013 at 5:32 pm

【苦茶Blog】Gundam Fxxker! $78我都要諗過囉!

by

TF20130724_01P

 

呢個題材想寫好耐, 不過一直冇乜誘因, 所以一直都同自己講, 唔好講! 唔好講! 因為1,000個人會有1萬種睇法, 不過睇住時代廣場高達展, 冇法! 真係要爆喇!

高達真係出過無數隻, 不過入得法眼嘅, 真係唔多, 到今日仍然熱血未減嘅, 只有渣古! 渣古係所有高達模型嘅始祖, 佢先可以叫元祖, 高達只係翻版! 係翻版呀! RX-78一直唔係我杯茶, 而且感覺仲係OK醜樣, 邊有理由射極都唔爆兼冇事呢? 係紅彗星射佢先叫痛!? 最憎人玩Cheat! 所以我一直對佢冇乜好感……係! 我認我係自護之餘孽, 我認我心裏面仲有自護之軍魂!

我仲記得有《一年戰爭》有一幕, 舊渣古徒手對戰白色之惡魔, 渣古設計唔止有軍事味道, 連揸過佢嘅人都特別Man, 高達!? 係發脾氣嘅小朋友先啱玩!

咁多代高達, 都唔係話冇一隻鍾意嘅, 不過真係唔多, 只有Z GundamMK-II同陸戰高, 近啲嘅有Strike, 冇喇! 有就有、冇就冇喺晒度喇! 講變形設計, Z Gundam係變形高達中最完美嘅一隻, 以後冇一隻靚仔得過佢, 而且勁有高達味道……獨角獸, ! 好好一隻高達, 又要扮吉姆, 你話有乜謂先!? 你話扮渣古深入敵陣, 再變返高達「偷蕃薯」就話實用啲啫。

MK-II係將舊高達進化為完美Detail, 愛舊高達嘅, 冇理由唔喜歡MK-II, 至於陸戰高……佢係第一套將高達帶入真軍事味道嘅動畫, 從此令「高達卡通」變得有血有肉, 令高達系列擺脫「焦焦焦、超人片」嘅框框之作!

至於Strike, 如果套句歷史用語, 佢可以話係高達系列嘅「中興王」, ! 情況就係開國君主多數都係雄才大略, 但跟手啲囝囝囡囡又冇個生性喎, 好彩! 又唔知走咗啲乜嘢狗屎運, 又生咗個叻仔Strike出嚟喎, 你話真係幾奇怪呢吓!?

不過成也Strike、敗也Strike! !Strike嘅設定同故事, 基本係全抄RX-78故仔, 仲要係臉不紅、耳不熱嗰隻, 基拉其實係阿寶嘅轉世, 佢哋嘅經歷差唔多一樣, 我當年睇, 我仲以為睇緊大陸老調玄幻穿越片呀陰公; 不過就係因為佢嘅成功, 令到笨大有新睇法! 就係橋唔怕舊, 左抄右抄亦冇人理, 呢條橋隱贏……後果係點, 所以就有ACE! 跟住就有今日嘅Gundam Builders! 其實我一直麒麟怪怪, 明明日本嗰邊有模型出, 點解香港好似唔多覺有嘅? 直至我有一日行「肥脆」, 竟然俾我見到有兩盒嘢出咗(可能有更多盒, 不過唔好報俾我知, 影每週玩具時我亦將會扮見佢唔到!) 真係好醜樣, 標價$144, 但馬上特價$78! 哈哈哈哈哈!

你舊機新做我都算喇! 你睇你攞呢兩條契弟出嚟幾靚仔? 我有一刻想買一隻睇睇, 究竟砌出嚟會點, 不過我最後寧願買隻BB算喇! $78一隻HG, 你話你出嚟做乜吖!? 故事擺明左抄右抄, 加架唔知乜嘢飛機, 搭架舊機體又當新版出! 手腳全部改肥改短, 其實我極度懷疑, 佢咁醜樣, 會唔會識到朋友!? 都係嗰句啦! $135都已經有一隻RG, 你話叫人條數點計喇! 其實我收到風, 好多模型舖都唔多大願意攞貨, 因為中招味道非常濃, 所以大家喺街度唔多見佢蹤影, 其實係好正常囉!