《退魔傳》主角炎飛
可能大家會對文嘉宏比較陌生，但佢嘅稿件差不多周周見街，無錯，《封神紀III》書末一頁搞笑漫畫〈瘋人紀〉就係佢負責嘅，佢八月尾出新書，自問港漫死忠Fans嘅你會唔會支持？
學甘小文話齋：「寫搞笑漫畫係最難嘅。」而《封神紀III》主編鄭健和又肯每期書都畀一頁紙文嘉宏發揮所長，足見佢手畫同度橋有番咁上下功力。據現有資料所得，《退魔傳》估計係本講神仙妖怪嘅魔幻之作，屬短篇，主角叫炎飛，面相同畫風穩陣大路，係我哋港漫迷最易接受嗰種，至於故事得唔得，就要等八月最後一個星期創刊至知嘞。文嘉宏喺面書專頁話：「多謝大家，呢本書之後我重有無機會就要靠大家嘅支持咯。」支持嘅請舉手！我已經舉咗手嘞。
資料來源：https://www.facebook.com/mankavon
