fbpx
PS Vita, 主頁, 遊戲新聞 — 10/05/2012 at 11:59 am

大量新圖 PS Vita變種芒亨 《Soul Sacrifice》 稻船敬二企劃 四人聯手打怪

by

SCEJ隻PS Vita合力打怪遊戲《Soul Sacrifice》之前預告話今日有新情報,果然FAMI通網站就即日發放大量新圖,預定今年冬季推出,由稻船敬二企劃,最多4人聯手玩戰鬥任務,已經冇得輸啦!

公佈資料顯示,遊戲將會由稻船敬二嘅comcept負責企劃,同Marvelous AQL以及SCEJ合作開發。而本村健太郎則擔任製作人,更會由作曲家光田康典與鋒山亘作曲。遊戲故事亦都有眉目,設定血腥暴力之餘,魔法都係遊戲裏面嘅重要原素。主角係被魔法師囚禁嘅奴隸,之後發現一本講述魔法師同怪物戰鬥嘅書,繼而就被吸入書中嘅戰鬥世界,化身成魔法師,嘩,真係童話一樣呀!

而書入面嘅怪物就係由人類嘅不同慾望化身而成,好似金錢啦,情慾啦,而主角就要使出犧牲自己身體唔同部份嘅魔法,例如爆射自己嘅手指出去,搞到血肉橫飛,又或者將眼珠變成雷射炮咁款……不過,講到最重要一環,都係可以四人聯手合作打任務,即係好似可以芒亨咁,圍埋喺麥當奴打怪啦!預定2012年冬季推出,係喇,我知,PS Vita有Wifi可以喺屋企連線都得嘛,但點及得上三五知己出嚟聚一聚打吓機過癮呀?

官方網站:
http://www.jp.playstation.com/scej/title/soulsacrifice/ja/