fbpx
編輯Blog — 09/07/2013 at 1:54 am

【編輯Blog】苦茶:點解踩車玩咁貴!? 史上最貴「20萬」單車

by
bmc-lamborghini-edition

bmc-lamborghini-edition

 

我知香港越嚟越多人鍾意踩車, 而且越玩越癲! 你見過最貴嘅幾錢, 幾萬? 十萬? 幾十萬? 點解我只問見過呢? 其實單車真係值幾両重先? 因為偷輕嘅原因而賣到咁貴, 我骨子裏其實覺得幾富貴, 幾皮嘢已買到架見得吓人嘅摩托, 幾十萬已經相當飛得吓, 再上去嗰啲級數……細路已經唔識, 因為買唔起!

識個FD用廿個買架單車, 我已經鬧到佢狗血淋頭, 我問佢想踩環法呀!? 再睇佢個愛人, 已經完全括咗出去, 再買多架十幾嘅, 一齊攬炒囉……妖! 出架全新Golf GTI好過啦! 你真係練足成世都唔夠佢個一波快啦! 你話呢個世代嘅人係乜嘢價值觀呢!?

我知有人會質疑我嘅睇法, 不過我係睇《極速傳說》同《頭文字D》大嘅, 第一樣要緊記嘅, 係車唔可以惡過人, 第二個令我深切反省嘅, 就係「我要買GTR!」 真心! 如果知道自己資質一般, 買架Benz + 金撈好過啦! 買架辣嘅, 話唔定你死咗都未知啦! 再講吖! 我個FD係八、九點踩市區 / 一星期兩次嘅普通單車友, 而且仲係第二朝要趕返工嗰亭, 咁大家明未吖? 係咪買架靚靚摺車好過先!?

其實唔使一定靚車先霸氣嘅, 話說細路有個老死住赤柱, 有晚同佢通宵竹戰, 第二朝佢車我返工, 起初唔為意, 但開工時間臨近, 見佢越開越慢, 我就兜口兜面問候佢兩句: 「你估我想嘅咩兄弟! 你唔見前面有個鬼佬踩緊單車咩!? 佢朝朝返工時間都由赤柱踩出去, 仲要踩正路中心, 咇佢嘅話, 佢就即刻伸隻中指問候你! 不過照樣唔X理你! 有人搵差佬搞過佢0架喇! 不過差佬都冇佢符!」 嗱! 呢啲咪霸氣囉, 話之你(才查)林寶、波子、法拉利, 都只可以跟住佢尾食塵, 佢架車都係普通料嚟之嘛! 不過人哋真係有生活態度(不過就罔顧他人生活態度咁囉!)。

又兜返轉頭, 講返最貴單車, 剛剛收到風, 有架值20萬嘅單車就嚟到港! 吓! 你嗰架貴過佢!? 唔係啩! 人哋嗰架係20萬歐羅喎!

架車個名叫BMC impec Automobili Lamborghini 限量版旗艦級公路單車, 據稱係同林寶聯乘一齊出0架! 全球限量30架、亞洲區限量2架、香港只係批到一架……聽講環法冠軍都係(才查)佢, 而且佢係用最新碳纖技術, 以碳纖線一條條織出嚟0架, 聽過硬度同彈性, 都達到全新一個層次……我知唔會買, 不過對於咁高新科技嘢, 真係要見識吓囉, 收風話7月18日星期四, 下晝六點後會喺「香港北角英皇道60號康福園地下A/B舖、Bull Bike Company 」展出, 真心係幾小圈子人知, 所以唔去睇就笨喇!