fbpx
主頁, 動漫資訊, 潮玩新聞 — 08/05/2012 at 11:45 am

倪匡開fb搞香港小說會

by

簡單直接,開宗明義講到明:「在一班熱心推動小說創作及閱讀文化的人士醞釀下,香港小說會正式宣告成立」,倪匡學人玩fb搞「香港小說會」,仲做埋榮譽會長,包括我在內嘅衛斯理迷必撐啦。

fb有乜睇?睇倪匡點睇依家嘅香港小說囉,佢推介翔子《放縱劍魂》,話筆觸似古龍,古龍迷必捧,呢本我無睇過,俾佢講到心郁郁,應該會搵番本睇睇。佢又讚喬靖​夫《武道狂之詩》係傑作,令佢最深印象唔係燕橫同荊裂,反而係東瀛女武士島津虎玲蘭,真真奇怪!我就認為荊裂型仔啲嘞。周顯本大作《碳六十​之劍》佢都有推介,話睇完會倒抽涼氣,絕對係江山代有才人出咁話,呢本小說我都有睇,寫包單絕對係好嘢,倪匡乜身份地位先,根本唔使賣廣告,信佢啦。 七八十後小說迷有無見舊版《老貓》?又有無見過戴金絲眼鏡嘅後生靚仔版倪匡?佢個妹亦舒中間分間紮孖辮Look,你有無興趣見識吓?淨係呢幾張陳年舊相,都值得你Click入去睇吓啦。至於倪匡有無份親自回覆,我絕對相信有,因為好幾個留言都有署名「倪匡」兩個大字,你話嘞,邊個夠薑冒認倪匡先?

參考:http://www.facebook.com/gameonehk/posts/379465728772577?utm_medium=referral&utm_source=pulsenews#!/hknovelist

 

好鬼死鍾意呢個Logo,睇到倪匡筆跡。