fbpx
主頁, 影音新聞, 編輯Blog, 電影 — 07/07/2013 at 7:20 pm

【編輯Blog】Reika:港產片《盲探》有驚喜

by

近年睇戲大概係五套西片先會睇一套港產片,唔係唔支持本地製作,而係真係買唔落手。對上睇嘅係《春嬌與志明》,今日啱啱睇咗杜琪峰嘅《盲探》,帶住期待嘅心情入場,因為係杜琪峯配韋家輝,其次係鄭秀文加劉德華呢個組合。賣飛情況好踴躍,場場爆滿,片長兩個鐘零十五分鐘,台灣人評價套電影「無尿位」,個人認為係近年難得好睇嘅港產片。

 

杜琪峯加韋家輝加鄭秀文加劉德華,有之前嘅《孤男寡女》同《瘦身男女》,個人認為比起杜琪峯自己孭飛嘅作品例如《黑社會》、《PTU》等等,少咗男人味,娛樂性較豐富,女觀眾較易入口。杜琪峯加韋家輝兩位都係無線編劇出身,之後二人合組銀河映像,不過之前合作過嘅都有伏味十足嘅《嚦咕嚦咕新年財》、《百年好合》,或者好似為攞獎而拍嘅《大隻佬》同埋《神探》。今次搵返老拍檔鄭秀文加劉德華,放喺暑期檔期,懸疑偵探片,基本上無得輸。

 

 

如果你一心好似我咁想睇一套簡單劇情片,你會覺得《盲探》已經係水準之上,有笑位有緊張位,台灣觀眾形容為「無尿位」,我都好同意,因為劇情好緊湊,結局無爛尾,你知,其實咁樣已經好難得。睇完我先發覺片長超過兩小時,不過無悶場喎。之前報紙話鄭秀文諗住呢套戲可以攞從都未攞過嘅最佳女主角獎,不過真心覺得佢演出無特別驚喜,老實,劉德華同鄭秀文都唔係好戲之人,雖然我其實都好鐘意佢哋兩位,不過演技真係迫唔嚟,你唔能夠要求佢哋有梁朝偉、周迅等演技派嘅功力,不過呢對組合出現喺大銀幕上,依然令我睇得好開心,好有親切感。
今次睇戲地點係好耐無去過嘅油麻地百老匯電影中心,因為網上訂飛所有戲院都爆晒,題外話係早排裝修後女廁大咗,男讀者都惠及倒,因為你花少咗時間等女朋友,而且抹手紙係我用過最柔軟嘅,令我忍唔住睇完戲再去多一次廁所,哈哈。