之前都見過類似產品，不過見到日本仔呢部Thanko AUTCT2BK, 真係好似見返多年冇見嘅老朋友一樣, 還記得當年做咗成個暑假跟車、搬貨搬到痴肺, 最後先買到部Walkman, 出街時一定幫佢上埋個藍色皮套、串喺皮帶、着住白色校服出街, 係! 佢就係聽卡式帶嘅Walkman, 我知八十後都好多唔識佢, 不過上咗四張嘢嘅, 應該仲有好多軟硬天師同鬼故嘅卡式帶珍藏, 咁就啱喇, 佢可以幫你直轉為MP3檔案, 直入microSD, 之後你就可以用電話聽、用MP3機聽、用電腦聽。
另外佢仲有AUX IN, 所以如果你有黑膠盤又或者仲Work嘅MD機, 都可以轉錄入去, 最正係佢錄歌時, 會自動幫你分章節, 一首歌一首歌分得清清楚楚! 點解Analog都可以分章節、同分歌? 無經歷過卡式帶年代嘅人未必知, 因為每首歌之間都會有冇聲位, 佢就會自動將佢定為每首歌斷位, 幫你分開每首歌, 講起我又諗返起, 當年由黑膠翻錄得最多為卡式帶嘅《無心睡眠》……
你話如果我買咗部返嚟, 串返落皮帶, 再帶住佢出西菜趁, 唔知會唔會俾人打呢!? 我真心想買, 大家俾啲意見吖!
http://www.thanko.jp/product/4632.html#spec