編輯Blog — 01/07/2013 at 10:38 am

【編輯Blog】苦茶:年紀越大 相機要越輕

by

 

做個簡單民調, 請問幾多人會袋相機出街? 我嘅觀察係非常少! 早兩日行過尖嘴某店前《怪獸大學》公仔, 1:1等身大毛毛同大眼仔喎! 真係差唔多平均每秒俾人影張相, 老實! 講Noise, 真係俾佢賺晒, 但我影吓影吓, 發現除咗遊客之外, 基本所有人都係用手機影相!

用手機影相有乜問題先!? 其實我就啱啱遇着有問題! 話說某日隨身相機冇乜電, 所以我就用咗手機影相, 而嗰輯相就係最新嗰隻韋基利模型書! 我真係頂你, 平時好少拉落電腦睇, 今次一用就出事, 鬆郁矇問題, 簡直係10年前DC仔嘅相質都不如, 仲要係成張相起晒砂窿, 平時睇芒真係冇乜問題, 相搵佢救命時, 點知係攞命藤!

不過世事又好奇怪喎! 喺我身邊好多朋友都係問我攞買D-SLR資料, 但大家又普遍唔會攞佢出街, 唔通淨係諗住去旅行先用? 其實咁樣非常唔符合經濟原則! 你諗吓, 一個打工仔, 一年有十零日大假, 可以出埠兩次去旅行已經相當唔錯, 一部D機最多興兩年, 兩年後再叫你攞佢出去趁, 都好似有啲舊到難為情, 六、七千買部入門機, 只用得4次左近……

其實我自己, 近年都好少攞部大D機出街了, 主要都係鎖佢入防潮櫃, 主要問題係真心孭佢唔起! 後生時出去跑, 一機兩鏡兩燈周圍走都冇問題, 到近年, 一機一鏡一燈, 三兩日後就會見肩膀痛, 所以部D機都係平時攞嚟拜吓、裝柱香, 出街都係NEX或者m4/3!

玩落老實, APS-C真係有又有相當優勢喎! 感光元件夠大, 一般暗黑環境下, ISO隊上1,600都有完美相質, 最後發現原來連閃燈都可以慳返……

記得教我影相嗰位人生老師, 一早已經講咗相機會隨住年紀一路偷輕, 唔通真係老了!? SONY今個星期新推了RX1R, 唔通真係要諗諗佢, 二萬幾喎! 真係好肉痛!

再諗吓, 原來用手機做相機, 或者係到我某個年紀嘅終極! 不過手機嘅設計, 以現時嘅科技技術, 又一定令佢影唔到靚相喎……做人真係好痛苦!