fbpx
主頁, 影音新聞, 電影 — 26/06/2013 at 12:00 pm

新片速報:《迷離夜》盧海鵬爆粗玩寸CY

by

之前都有提過作家李碧華《夜》系列小說將會改編成電影,仲分上下集《迷離夜》同《奇幻集》,上下集又各由三個小短篇故事組成。《迷離夜》導演之一陳果搵盧海鵬同邵音音做場講打小人嘅對手戲,明寸CY,大快人心。

呢條預告片好簡單,講黑社會大阿哥梁震嬰(盧海鵬飾)去鵝頸橋問米,同負責打小人嘅神婆(邵音音飾)互相頂嘴,「梁震嬰」三個字已經明寸CY,對嘴內容更加啜核抵死,兩個老戲骨演得相當自然,寸人盡在不知不覺間,忍唔住要抄對白出嚟畀大家睇睇(7月11日上映)──

梁震嬰:喂快啲……

神婆:呢啲嘢唔急得架,睇你都係第一次嚟,畀啲特別優惠你。

梁震嬰:唔使,唔使,錢我大把,總之靈就得嘞。

神婆:拿,麻煩你寫低你個名吖……哈哈,梁震嬰?

梁震嬰:唔係咁大聲啦,鬼叫個X樣同我同名同姓咩?

神婆:好好!嬰哥呀,你要我點幫你呢?

梁震嬰:有人阻我上位。

神婆:好正常喎,哈哈,你個名都叫梁震嬰咯,哈哈,繼續……

梁震嬰:如果龍頭我坐到呢,嗰班X家剷就有運行嘞,即係話,搵到水呀。

神婆:咁你有俾佢哋知道你可以幫佢哋搵到水吖?

梁震嬰:印象中我又無。

神婆:你想搵咁多錢,做乜X嘢呀?

梁震嬰:咁你搵咁多錢又做乜X吖?

神婆:我幫你消災嘛。

梁震嬰:我幫香港消災嘛。

神婆:哈哈,消你老母吖……

梁震嬰:喂,唔好鬧我老母喎。

神婆:唔係,我係鬧緊嗰班你要打嘅小人呀。拿,嬰哥,我郁手架嘞。

梁震嬰:好,打。

神婆:震嬰哥,企定嘞,蛇蟲鼠蟻好X多……