fbpx
主頁, 編輯Blog — 23/06/2013 at 10:28 pm

【編輯Blog】爆炸哥:龍貓,很想要吧?

by

上個星期,其實好忙,忙到冇乜特別事發生。比較記得嘅係吉卜力喺香港開嘅《Donguri Republic》終於開業。我哋採訪團隊喺開張前一日去咗影相介紹,得到呢份禮物,幾有心思喎,有幾個非賣品煤炭屎鬼襟章,仲有隻龍貓,而且個包裝仲學番動畫入面龍貓送俾人嗰袋種子咁,要讚。

宮崎駿嘅作品就係勁在平時唔睇動畫嘅人都會識都會睇。個人嚟講最鍾意都係《夢幻街少女》,好浪漫。係,其實我係好感性嘅。

不過採訪當日未買得嘢,我本來好想買呢個龍貓風扇,好實用。可惜之後幾日都已經要排長龍入店,睇嚟要過一排先會再去喇。

相關報導

率先直擊! 龍貓巴士嚟香港《Donguri Republic》明天開業 宮崎駿作品大集合

其實o依家開喺香港嘅舖頭,係主攻香港人定自由人?

爭啲唔記得,其實我仲睇咗《World War Z》,好多人話套戲冇劇情,我又覺得唔差,成千上萬嘅喪屍湧住嚟都叫有新意,而且呢類娛樂片拍得刺激最重要,細節位合唔合理,我就唔會咁挑剔喇。

1周年送大禮真係送到手軟,不過見到讀者咁支持,我哋編輯部都好開心……但係點解錢編輯好似成日望住我呢份禮物仔……喂!唔好吼住我呢份龍貓喎……唔好呀呀呀呀呀呀!

唔好意思我又唔喺電腦前面,麻煩錢編輯幫我post呢個編者話喇。