fbpx
編輯Blog — 23/06/2013 at 7:19 pm

【編輯Blog】苦茶:相機+Android 你真係要咁急嗎?

by

今個星期IT界大事, 一定係Samsung倫敦發佈! ATIV Q 好搶眼, 唔係因為佢個雙系統, 亦唔係佢幾薄幾細部, 反而係佢個3,200 x 1,800靚芒, 貼住4K質素, 真心有啲扯扯哋! 不過佢生不逢時吖! 4K軟件仲未當道嘅世代, 有個咁靚嘅芒可以做乜呢?

我係一個現實人, IT資源過剩嘅年代, 大家唔應該花多餘嘅錢、去買未用到嘅嘢, 呢個係基本購物概念(將來先用到嘅嘢! 係將來嘅事, 到真係要用先買啦, 可能到時會更平更好!)! 否則你會為追而追, 多多錢都唔夠你玩; 正如你玩街頭Snap, 正常你唔會買部頂級單反, 反而你會考慮買部高階無反, 甚或一部靚手機就算, 當然, 如果你有錢玩Leica我都吹你唔漲!

 

不過講到成個展會最錯嘅, 我覺得係部Galaxy NX, Android系統硬植入無反換鏡相機, 我想問乜人會買呢? 我明! 用手機影相係唔夠靚, 亦唔似大感光元件相機, 可以做到淺景深效果、同好實淨嘅成像, 不過都唔係嗱住咁大部相機成日通街走0!

如果你話我聽, 有人日日嗱住部GNX出街, 只係為咗得閒影張「飯前相」, 我覺得成件事會係相當神秘囉! 好喇! 你唔係成日嗱住佢出街時, 點知又俾你咁啱撞正喺西菜有條金髮洋妞裸跑喎! 你話影唔到張靚相+靚片上facebook會幾唔開心呢?(! 好彩我仲有部手機跟身啫!)

再講吖! 如果你只係為傳相上社交網更方便, 其實0依家好多單反、無反甚至DC, 都有內置Wi-Fi功能, 只要開着佢就可以掟相喇! 點解我要出多張4G3G, 插落部相機度先? 唔通大家真係咁多閒錢!?

! 我唔否認我想買部Galaxy NX, 但係前題我係傳媒人, 而且仲係做網嘅, 所以有啲環境我真係需要即時傳相, 急到連接駁手機時間都冇, 而且有啲環境, 係真係要換鏡先影到, 你話如果上次Apple個發佈會, 我可以有部GNX, 我就唔使不斷又掹又插卡落電腦, 即時傳相返公司啦, 不過……正常人會有我呢種煩惱嗎!?

Samsung新機中, 我比較睇好嘅係Galaxy S4 zoom, 手機玩10倍光學變焦鏡頭, 相對相機真係細部咗好多(不過如果比對返手機, 佢係進擊的巨人嚟囉!), 我覺得呢部機行啱咗第一步! 大家玩手機影相多年, 不過一直都係玩定焦, 你話有光學變焦嘅手機出喎! 係咪好期待先? 不過……三叔有一點計錯數, 就係佢嗰碌鏡頭, 未打開鏡頭已經有15.4mm機身厚度, 有幾多人願意放佢入褲袋呢!? 其實講到尾, 到此機正式來港時, 我覺得啲電器連鎖店, 會將佢放入相機櫃位會易Sell啲囉!

其實我真心唔明, 其實DC仔嗰邊, 早好多年前已經有潛望式鏡頭出現, 點解要放咁大碌炮喺機背先, 我知鏡組設計唔同, 潛望鏡式鏡頭好難做到伸縮式鏡頭咁好相質, 不過放到落手機嘅成像系統, 真係咁大分別嗎?

你可能又會話, 用潛望鏡式設計, 機身會變得好長, 甚至有機會好似iPhone 17咁長……其實我有一個幻想, 你話如果呢個鏡頭組件, 可以好似Ricoh GXR, 係一個鏡頭連感光元件嘅模組, 有需要時先插落機尾, 而且仲可以有扭擰式設計, 你話係咪好妥先?

不過點解好似IT產品越出越方便, 但係反而令工作量不減反增呢?

我仲好懷念菲林年代, 15分鐘出菲林底片, 揀完相之後要用30-45分鐘晒相, 呢段時間夠我食個晚飯後, (才查)住實相先寫稿……0依家情況係點? Whatsapp打得最多嘅, :Send咗相返嚟先啦! 字你就口報我打啦! 唔使急但最緊要快!