主頁, 編輯Blog — 23/06/2013 at 6:26 pm

【編輯Blog】錢無義:《Gantz》完結!收藏出土!

by

唉,今個星期,《Gantz》終於完結,其實無論幾多人彈佢爛尾,話佢唔完都冇用,我都曾經沉迷過。你都總會試過沉迷一樣嘢,總會感受過當嗰樣嘢完結時嗰份失落。你會希望佢喺你最沉迷嘅時候離開?還是等你熱情過後對你可有可無嘅時候完結?我摷番啲《Gantz》珍藏出嚟影相先發現,我曾經沉迷到過日本睇真人電影版。

介紹吓啲收藏,其實《Gantz》出過嘅精品玩具唔算多,有啲質素真係幾差,連我呢個fans都買唔落,pass咗嘅包括有Medicom嘅麗佳,啱啱見到苦茶話精品搞緊特價,$960,真係有啲心動,不過諗起佢塊白過紙嘅臉,個樣其實唔似,而且最重要係唔夠大……呢個係麗佳嘅特徵呀!搞錯。仲有就係岸本惠嗰兩隻景品,又係醜到買唔落;最後就係啱啱出咗玄野計同加藤勝嘅Figure,貴到爆嗰兩隻,質素唔差,但唔抵。

呢樣又唔啱嗰樣又唔買,咁手頭上有咩?Medicom玄野計囉,件衫冇得頂o架,暫時冇熔……把Z槍有晒電線,夠細緻o架!如果件衫啲窿識發埋光就妥晒!仲有麗佳嘅Figma,非賣品,係隨日本特別版第26期「送」嘅,買咗佢就梗係要襯埋同廠嘅電單車,呢架好嘢係喺打恐龍嗰章第一次出場,型到爆,而且個大轆同手把真係好可以轉,可惜嘅係Figma冇再話出其他角色,冇人坐後座……

最後兩件,就係我過日本睇戲嗰陣買嘅,一個係黑球鎖匙扣,有個制可以撳,黑頭入面就會透出「Gantz」字,另一邊就係黑球叫佢哋出發嗰句,我到o依家都唔捨得掛出嚟。仲有就係post card同本唔知收咗喺邊嘅場刊……

我的的確確沉迷過。記得對一次去日本入場睇戲,已經要數到《Touch》真人版喇,兩套都冇乜令我失望(《Gantz》只限上集,下集直情連碟都冇買!)。如果要我揀,我都係揀畫到冇嘢好再畫嘅時候完啦,起碼冇咁傷感冇咁唔捨得。