fbpx
主頁, 影音新聞, 編輯Blog, 電影 — 23/06/2013 at 4:57 pm

【編輯Blog】Reika:入大學做足準備!再睇《怪獸公司》

by

Pixar動畫我全部都有睇,《怪獸公司》、《反斗奇兵》、《超人特工隊》更加係我嘅最愛。7月11日上畫嘅《怪獸大學》當然係必睇,仲要起碼睇三次呀!為咗入大學,我呢個星期日做足準備,再次翻睇《怪獸公司》,仲再loop多一次《怪獸大學》嘅所有trailer,好充實!

雖然已經第三次睇《怪獸公司》,依然覺得超好睇,咁多個角色之中,其實我最鐘意都係毛毛。記得第一次喺戲院睇嘅時候,當時係2001年,即係12年前,真心覺得彼思嘅特技好厲害,可以做到毛毛身上嘅柔軟毛髮,真嘅一樣。至於大眼仔,我嫌佢太多嘢講有少少浮誇,不過佢對朋友毛毛嘅義氣,臨尾都返去幫佢手,呢方面我又好欣賞佢噃。至於細路女阿Bu,我無鐘意過佢,因為覺得佢好嘈吵,嘻。

 

鐘意《怪獸公司》,因為覺得佢嘅故事設定好有諗頭,能源短缺用小朋友尖叫聲製造能源,而且有一道道門通向世界各地小朋友嘅屋企,新奇刺激。而且我偏好,一定只會睇廣東話配音版,因為睇啲咁輕鬆嘅卡通片,仲要追字幕實在太唔化算嘞。上一集有森美、Kenny B.鐘鎮濤、鬼王雷宇揚同埋消失咗嘅李彩華做配音,今次《怪獸大學》唔知會由邊個配音呢?千祈唔好係王祖藍同埋糖妹呀,我嬲架!

新一集《怪獸大學》美國兩日前正式上畫,香港呢?要遷就暑假檔期,7月11日先有得睇。睇trailer,大眼仔米高今集戲份似乎好重,希望唔會搶晒我嘅毛毛鏡啦。另外,上網見倒有2D同埋3D版本揀,我一定只會揀2D版本。要讚吓最近好多戲院都有得比觀眾揀3D或2D,而且場次差唔多,咁先係真正尊重消費者意願嘛!

 

 

故事簡介
大學新生毛毛和大眼仔一見面就擦出火花,完全頂唔順對方,日日鬥個你死我活,不過他們因為共同面對被趕出校的危機,被迫化敵為友,展開歷險,最終更成為一起出生入死的最佳拍檔!「怪獸」式的大學生活創意無限超乎想像,過程有驚有喜,爆笑不絕,加上各式新舊怪獸爭相登場,以及原裝聲演班底喜劇巨星比利基斯度 (Billy Crystal) 和尊古曼 (John Goodman) 搞笑演繹,《怪獸大學》絕對是2013年最令人期待的3D動畫鉅獻!

 

忍唔住分享多幾張《怪獸大學》靚圖,唔駛錢,送嘅!