fbpx
主頁, 影音新聞, 電影 — 23/06/2013 at 3:18 pm

23/6一週碟報價: 《毒戰》局中有局 《飛越巔峰》啊啊啊啊!!!!!!!嘭!!!

by

 

今個星期飽喇! 多到唔知買乜碟好! 話題作一定係《傑克: 巨魔獵人》, 據報佢係今個星期銷量冠軍, 冇計啦! 靚聲靚畫, CG喺呢方面係強啲; 不過個人覺得故事一般般, 並唔係因為佢由童話改編, 其實原著童話原本非常血淋淋0! 係之後為咗小朋友市場, 而將佢弱智化, 《傑》就係一套咁嘅作品, 小朋友睇, 似明非明, 大人睇又唔夠癮頭……係故事啫, 聲畫對夠你炸爆機!

個人最愛係《毒戰》! 杜琪峯、韋家輝! 仲有古天樂、盧海鶻、張兆煇、林家楝、林雪……講毒販的故事, 兵賊鬥智、局中又有局, ! 為咗入大佬市場, 某啲位唔敢去得咁盡, 不過都已經好好睇! 簡單小品有《北京遇上西雅圖》, 國內票房勁到爆燈, 個人又好鍾意湯唯……先巴辣香雞、後小鳥依人……SKII話齋: 你唔睇就嘥喇!

我知大家着眼都係藍光, 不過今個星期有三套片只出DVD, 佢哋分別係《微男博女》、《笑功震武林》同《夜凶》, 另外到最後! 今個星期有一套係必買嘅! 史泰龍《飛越巔峰》! 我知後生一輩好可能唔知乜戲, 你有冇諗過拗手瓜都可以拍一套戲吖!? 仲要係年度票房大作! 我仲記得當年興起一陣拗手瓜熱, 而且我仲真係拗斷過人手瓜……係堅入醫院嗰隻, 史泰龍拗到嘴都歪埋, 發力嗰一吓, 啊啊啊啊!!!!!!! 我諗起都仲起晒雞皮, 呢啲咪戲囉! 仲要係Remaster1080p畫質, 你話唔買!? 呢個世上仲邊有好戲睇呀!?

 

 

 

 

 

 

 

 

 

 

 

 

 

 

 

 

 

DVD