Android, 主頁, 手機/電腦 — 20/06/2013 at 4:59 pm

Xperia ZR堅1.5m防水 IT記者試到呵呵聲

by

Sony公佈會喺月底出Xperia ZR, 最大賣點係佢使用咗高階嘅IP55/58的防水規格! 之前佢出嘅機絕大部份只係生活防水, 即係最多淋吓兩又或者濕手玩吓冇問題, 但係ZR可以下潛1.5m30分鐘, 係咪好興奮先!? 用嚟點玩好呢? 用嚟沖涼傾電話, 好似大才小用咗啲, 攞去泳灘又好似邪惡咗啲……

你話我心邪!? 話說噚日ZR開咗個泳池記招, 有兩個水着Model攞住佢俾全港IT記者任影, 我真係好耐冇見大家影得咁開心、又齊心囉! 而且影一、兩張又Check吓相, 不時又傳出甘小文嘅招牌呵呵聲……世事咪就係咁簡單囉!

實際上手試用, 感覺都真係幾順吓! 始終都係行Qualcomm Snapdragon S4 Pro 1.5GHz四核心處理器配埋2GB RAM, 正常操機都幾夠使吓, 不過唯一可惜係個芒細咗啲, 1,280 X 7204.6”, 喺呢個年頭就真係輸蝕咗啲, 好在配返個Mobile BRAVIA Engine 2, 都叫色準又夠實淨。

始終影相、拍片先係佢強項, 1,300萬像素Exmor RS for mobile, 背光式感光元件對陰暗位處理的確有一手, 仲有埋HDR影相, 以手機相質嚟講, 都已經列入高階手機級別, 最勁係佢機側仲有實體快門掣, 長按兩秒就開機影相, 再㩒實快門唔放就會15fps作連拍, 再加埋1080p拍片, 都真係強到冇嘢講! 機價稍嫌貴, 月底開賣$4,698……不如喺度做個簡單民調, 如果大家買咗佢, 最想用佢落水影乜呢!? 我就諗住影水馬騮喇! 又或者同女朋友拍吓手着私影咁啦! 大家到時開心Share嚟睇吓!