fbpx
主頁, 動漫資訊, 潮玩新聞 — 02/05/2012 at 10:00 am

《古惑仔》1500期:牛佬的欷歔

by

一本長壽漫畫可以出到1500期,其實都幾好嘢,《古惑仔》陪伴咗我接近廿年,發展到依家,牛佬筆下的第一男主角陳浩南都兩鬢染白,一個虛構嘅漫畫角色可以牽動我呢個活生生嘅人情緒足足廿年,係唔係要寫個服字先?

真架,好記得陳浩南做咗「洪興」龍頭之後自甘墮落,搞到揩埋白粉,我個心即時一揪:「唔係嘛,咁唔自愛嘅?」又記得佢炒燶股票兼同山雞對賭二千萬,盤口無記錯係地中海對太子打擂台,最後輸埋,我又戥阿南哥好很唔抵:「唔係咁黑嘛?連太子都打輸?」更記得佢好殘忍咁殺死阿夜,一把東洋刀毫不猶豫就隊落去,我幾乎嗌咗出嚟:「咁殘忍嘅?仲係唔係人嚟架?」依家諗番起,我當時有咁嘅反應都幾好笑,只可以講一句,我真係睇得好投入。

1500期,點都係一個里程碑,但牛佬似乎處之泰然得過份離譜,無過份興奮,反而喺專欄話:「噓……1500期,真係唔知講乜好!好似好多感觸,但係又好似無乜特別!」筆觸過處,淡淡然有股不勝欷歔之感,或者同呢幾年港漫萎縮得太厲害有關係啩?不過點都好啦,1500期點都值得慶祝,普通版封面陳浩南擔頭,後加甘尚武、梁家仁、李志高、徐世飛、伊文華同生滋等八大壯士嘅第二代襯托;20周年豪華紀念特別版確實豪華得多,用硬皮做封面,摸上手有種磨砂感覺,同樣係陳浩南居中,仲一次過出晒大飛、山雞、陳耀、大天二、韓賓、十三妹、灰狗、靚媽、伊健、生蕃同太子呢班上一代嘅十二(手查)Fit人,內文另加多兩篇〈洪興(手查)Fit人外傳〉,脆脆哋屈多你五皮,係牛佬Fans的話,無得慳啦。

 

1500期《古惑仔》20周年豪華紀念特別版$20

 

1500期《古惑仔》普通版$15