fbpx
主頁, 動漫資訊, 潮玩新聞 — 30/04/2012 at 2:00 pm

時事人物走入《古惑仔》世界

by

 

拿,呢個甚麼阿樹,係唔係似唐唐先?

 

 

呢個甚麼阿信,就直頭係梁振英啦。

 

呢排牛佬唔知搞乜,好鍾意將啲時事人物放入《古惑仔》,1493期〈好心做壞事〉講梁家仁競逐觀塘區坐館,佢條女阿茜故意生事,聯同梁家仁門生阿信,喺酒吧執咗另一候選人王力門生阿樹一劑,上檯講數一幕,阿信個樣畫到鼻孔朝天,又惡又奸,明眼人一眼就睇得出影射緊梁振英;而阿樹呢,又專登畫到塊面勁長、講嘢口窒窒,唔使問梗係影射緊唐英年啦,兩人手指指你一句我一句:「你講大話!」「你講大話,單嘢根本唔係咁!」呢幕更加似曾相識,經典對白擺明出自特首辯論會,非常盞鬼。

緊接1494期〈寶座誰屬〉仲得意,居然出埋香港人網主持黃洋達,話黃洋達同「洪興」龍頭韓賓好Friend,受邀請上船參觀坐館點票,戴軍帽留二撇雞嘅佢一上船就話:「嘩!成班爛鬼喺度搞競選,香港啲差佬都唔Q知?X那星!我真係無法理解。」初頭我都無法理解牛佬諗乜,睇番專欄先知原來佢極欣賞呢個新一代名嘴,所以掟佢落《古惑仔》客串,不過講到最最最搞笑,係1495期〈千里追兇〉,故事講梁家仁最終當選,但在場有人唔服,搶咪發言,邊個咁斗膽?咪就係早排Hit爆YouTube、自稱來自美國三藩市「福清幫」第二把交椅嘅四三八龍心囉,呢個畫到個額頭鬼五馬六、一身皮褸留長髮、以為自己好似謝霆鋒嘅傻佬,牛佬一樣捉佢落《古惑仔》玩玩,睇到嗰刻,我直頭唧一聲笑咗出嚟,爆笑道十足呀。去到1496期〈長生不死〉,哈,呢鋪連才子都唔放過,講九龍城區坐館選舉,候選人主要有伊健黃紙兄弟小春同大底陶傑,你無睇錯我無寫錯,真係陶傑,牛佬仲專登畫到佢賊眉賊眼、烚熟狗頭、剔起個嘴角成個小丑咁款,莫非……牛佬好唔妥陶傑?如果有機會的話,真係要兜口兜面問清楚牛佬。

 

黃洋達都出埋場,牛佬玩盡時事出位人物。

龍心,造型、對白同YouTube見到嘅一模一樣,爆笑!

又拿多次,呢個就係陶傑嘞,點解個樣咁似小丑嘅?