fbpx
PS3, 主頁, 專題熱話, 遊戲新聞 — 06/06/2013 at 2:53 pm

越洋專訪《The Last of Us》製作人:「唔駛打Boss,唔會有超巨型怪物。」

by

遊戲喺6月14日就推出,預告片睇過好多,但係對遊戲嘅疑問都好多。今次GameoverHK同Naughty Dog嘅《The Last of Us》製作人Erick Pangilinan(Art Director)做咗一個Email專訪,佢強調遊戲著重真實性,要玩家玩得投入,係求生求存而唔係要拯救世界,所以遊戲入面唔需要打Boss大佬,亦都唔會有超巨型怪物出現。咁有冇強勁武器等玩家唔駛鬼鬼鼠鼠,可以大嗌一聲:「啊啊啊啊啊!」衝出去殺晒啲感染者呀?

 

為甚麼會強調這遊戲的敵人是感染者而不是喪屍?
《The Last of Us》嘅世界係被Cordyceps病菌感染嘅,人類被感染再人傳人。佢哋會因感染嘅唔同程度而有唔同行為,有啲叫Clickers,有啲叫Runner,佢哋都係因為佢哋嘅行為而命名,正如感染者一樣。

 

試玩過之後,發現遊戲難度不低,製作團隊會有這個感覺嗎?
遊戲中嘅世界就係咁艱難囉,要喺一個物資短缺嘅世界生存,係有一定難度,所以我哋試圖將呢種真實感帶入遊戲裏面。我哋都會俾玩家學識組合唔同武器同埋用唔同招數,平衡遊戲難度,不斷強化先可以喺呢個世界生存。

 

在遊戲中有機會得到大火力或無限彈藥的武器,讓玩家殺個痛快嗎?
呢隻遊戲我哋著重真實感,而喺一個經過病菌洗禮20年後嘅世界,資源真係會有限。想要殺得痛快,玩家就要想辦法搵唔同嘅資源同武器喇。如果玩家搵到足夠嘅零件去強化武器,戰鬥力會大增,而且遊戲中都會有大殺傷力嘅武器,可以自製。

 

你們相信現實世界有機會出現這種病毒令人類滅絕的危機嗎?
遊戲中嘅情況係好有科學根據嘅,而且Cordyceps感染人類亦係有可能,不過以現代嘅科學同醫藥,可以避免遊戲中嘅情況發生。

 

遊戲會否有多個不同的結局?
唔會有唔同嘅結局,我哋係講緊Joel同Ellie嘅故事,等玩家可以經歷一次難忘而獨特嘅求生旅程。

 

主角身處的地區是那裏?環境設定中有參考那個國家?遊戲中的世界已經變得荒蕪,設定中有否講到其他國家的狀況?
遊戲背景發生喺美國,其他國家嘅情況我哋冇直接咁描述,但遊戲故事中都會講過全世界人類人口已經大量減少……

 

製作過程中發生過甚麼最為有趣的事情?最難取捨的地方在哪?
2012年E3好難忘,因為係第一次公佈呢個遊戲。遊戲總監Bruce Straley拎住手掣玩Demo,之後跌咗個掣……我哋仲做咗好多驚嚇嘅聲音令大家都可以感受到呢隻遊戲嘅獨特感。同一班咁有才華同創意嘅製作人合作,實在好有趣。

 

對於PS4有甚麼看法?已有計劃在新世代主機推出遊戲嗎?能透露甚麼?
PS4係一部好厲害嘅硬件,我們好期待喺呢部主機推出遊戲。就係可以透露咁多喇。

 

除了人類外,會出現其他被感染的動物嗎?會否有超巨型或變種的敵人出現?會有波士級的敵人出現嗎?

遊戲係講人類被感染,所以唔會有超巨型、怪物級嘅感染變種怪物出場,呢啲原素唔合呢個遊戲嘅真實風格。遊戲中嘅角色會互動會有好多溝通,而且都係人性同埋比較踏實,佢哋目的就係要喺呢個世界生存,所以傳統嘅打Boss玩法唔會適合呢個遊戲。Joel同Ellie同遊戲世界內其他人一樣,佢哋都希望繼續生存,所以要忍耐。

官方網站
http://www.lastofus.com/