編輯Blog — 02/06/2013 at 10:59 pm

【編輯Blog】苦茶:超羣重開!易手變老虎竇 不如唔好開

by

 

如果之前有睇我個Blog,應該知我係街機迷,之前講關門大吉嘅旺角超羣,最近終於開返,門面裝修靚仔晒,而且冷氣都凍咗,不過……已經唔係嗰回事,裏面全部係老虎機、釣魚機同鬥地主,無晒拳皇、街霸、GVG,屌! 完全冇晒霸氣,只想講句,真係唔開好過開!

好開心!喺超羣門口撞返班舊機友,知道佢哋原來去咗某間旺角上樓機舖打躉,即刻、馬上、立即去開佢哋波打Gundam,幾個月冇打,現實係已經回晒塘,史上最惡1,000機之名不再,仲要俾人撚,嗰種感覺……

唔知點解,硬係覺得氣氛怪怪,最後從老死口中得知,原來嗰個係稻草人場……唔係話放一隻隻公仔喺度,而係有人High……以後都係少去為妙,否則差人查牌一定好煩。

不過,講開又講,如果大家有留意街機走勢行情,應該都會發現,其實都好似好耐冇乜爆得出嘅街機遊戲,甚至連新Game都極少有新返,呢個情況由幾時開始?大概由手指指鬥地主開始吧!佢的確為唔少機舖搵過大錢,不過0依家嘅情況係,收益比最頂時期1/3都冇,唔係啲人叻咗,每舖都打耐咗,而係堅少人打咗,曾經一度,機舖老闆想用老虎機接捧,不過現實係初期唔錯,但0依家係反不如鬥地主,其實做任何行業都係,靠晒某一門嘢,係自己趕自己入絕路!其實好多街機格鬥Gamer,其實喺呢幾年冇新機情況下,已經開始金盤洗手,還記得當年30幾人組成「超羣聯誼會」,一個星期五、六晚打Z Gundam再約去食飯,現在九成九人流失,生仔嘅生仔、返工嘅OT、讀書嘅讀唔成要開始做苦工了,街機前景真係極唔看好,後生嘅都係家用機同電腦遊戲做主導,哎!對手難求呀!