fbpx
主頁, 動漫資訊, 潮玩新聞 — 24/04/2012 at 12:00 pm

阿夜剝衫賀《古惑仔》創刊二十年

by

唔經唔覺,原來《古惑仔》已經創刊二十年,過多兩期就出版到1500期,主角陳浩南仲入選埋「香港漫畫星光大道」,遲啲會豎立塑像俾人朝拜,所以話南哥已經成為港漫Icon角色之一,同王小虎、華英雄、李小龍等等睇齊,相信無乜港漫迷會反對。 學柴九話齋:「人生有幾多個十年?」何況係廿年?唔係誇張,南哥真係陪伴我成長,雖然每周要俾牛佬硬屈三十大元,但Miss一期半期我個心都硬係有啲籮籮攣,依家已經好少港漫令我引頸以待,周一等周四,周四等周一,一出版就要仆落書報攤即買,而《猛龍過江》、《隻手遮天》等電影系列都唔知翻煲過幾多次,連帶鄭伊健都成為我偶像,「不管天邊風已起,至想依依抱著你,路遙長夜記憶從不捨棄~」《甘心替代你》更加係蒲K必唱,好難想像有朝一日如果無《古惑仔》睇,我生活會有幾空虛。

為賀《古惑仔》創刊二十年呢個里程碑,今期1498期〈大梵空降〉推出兩個版本,普通版大梵做封面,依舊賣$15;精裝豪華版賣$20,內容加插兩篇〈洪興(手查)Fit人外傳〉,封面超有心思,比以往嘅甚麼四五六拉頁封面更出位,只要你一拉揭開硬皮,即見阿夜坐喺南哥後面,全身搵塊布都無,三點盡露不禁先令我眼前一亮,然後欷歔萬分──無記錯的話,係南哥搵殺手世傑同迪文暗殺阿夜,監生射斷佢隻腳;又無記錯的話,都係南哥掛住同阿夜做愛做嘅事,先搞到細細粒俾車寶山買起;再無記錯的話,阿夜係因為錯信南哥,而被南哥一把東洋刀貫腹而死。單計女角的話,甚麼KK、莊亞琳、十三妹同靚媽統統係閒角,Maggie都唔多入流,細細粒都要行埋一邊,只有阿夜,先係我最鍾意嘅《古惑仔》第一女角,可惜吖,牛佬就係咁狠心,要佢死得咁慘。 真心嘅,祝牛佬長命百歲,因為只有佢身體健康,《古惑仔》先可以長賣長有。

 

1498期精裝豪華版《古惑仔》$20。

 

揭開封面硬皮,即見全裸阿夜。

 

1498期普通版《古惑仔》$15。