主頁, 編輯Blog — 19/05/2013 at 10:20 pm

【編輯Blog】Reika:唔覺意睇咗TVB《畫時代》

by

夜晚食飯前開著電視,無線播緊《畫時代》,原來已經係第三集。節目講以前嘅香港漫畫,例如《老夫子》、《兒童樂園》,勾起我好多童年回憶。今集仲訪問咗王澤嘅兒子王澤、黃玉郎、李司棋,係罕有地好睇嘅TVB節目。

 

 

節目入面提及原來《叮噹》(多啦A夢)係70年代開始喺《兒童樂園》連載,而將呢本漫畫帶嚟香港嘅係張浚華女士社長,佢仲幫呢幾個人物改咗靜兒、技安、大雄呢堆好有親切感嘅名字。

 

今時今日,港漫已經離我好遠,讀書時期,除咗《老夫子》,仲有媽咪成日買嘅《怪異集》(全本都係鬼古短篇,嚇到我夜晚唔敢一個人去廁所);阿爸成日買嘅《古惑仔》,我自己呢?我鍾意睇《百分百感覺》,係,劉雲傑嗰本,即係之後梁詠琪陳曉東領銜主演嗰套港產片。
因為細個無iPhone但有聖誕假新年假復活假暑假,所以仲會去租日本漫畫睇,嗰段時間認識咗《男兒當入樽》、《亂馬》、《幽遊白書》、《龍珠》,仲有不計其數嘅少女漫畫。不過今時今日,除咗要做網站外,每日仲要上facebook玩whatsapp,漫畫?真係好遠好遠。

 

 

不過更重要係,今時今日嘅港漫只有武俠類型,完全放棄咗女讀者市場,以前嘅本地愛情或者鬼故港漫已經不復存在,都啱嘅,就算而家再推出《百分百感覺》呢類港式漫畫,喺今日娛樂、資訊充斥嘅年代,仲有幾大市場?

差啲唔記得,呢期仲有大熱嘅《進擊之巨人》,可惜我仲未有時間開始睇,目標都係真人版電影上畫前試睇吓,至於嚟緊呢個星期,估計都係一邊打稿,一邊睇下一集嘅《畫時代》懷緬吓算喇。

 

《畫時代》節目重溫:http://programme.tvb.com/lifestyle/touchedbycomics