主頁, 編輯Blog — 19/05/2013 at 5:10 pm

[編輯Blog]錢無義:新玩具,綾波麗幫我揀電腦……

by

隨住網站瀏覽量越嚟越高,都係時候要搵多啲嘢搞吓,例如,拍多啲片。以往拍片之後剪片,都要靠公司部電腦,再唔係就要搵拍片人小明幫手,但嚟緊開箱試玩片會拍多啲,都係時候幫屋企部腦升級喇。買咩機好呢?最後決定買手提電腦,咁要剪片就揀i7啦,可惜市面上用i7又係白色機嘅選擇唔多……點解一定要白色機?就係因為綾波麗。

其實除咗綾波麗,仲有明日香同真希波。話說上次去日本原宿嘅EVA專門店,忍唔住手買咗呢三張超貴嘅貼紙,貴嘅程度係我買完會後悔嘅,港幣成二百幾蚊一張呀!係刮貼,我諗咗好耐都唔捨得用,到我買手提電腦之時,就決定一定要將貼紙貼喺機背。咁黑色機唔起噃,所以我今次買電腦一定要買白色機,為咗綾波麗、明日香同真希波嘅幸福!

最後,買咗部L字頭機,冇計,正如我先前所講,白色機選擇唔多,本來想買S字頭都買唔到,我嘅堅持甚至去到唔理個品牌靠唔靠得住,耐唔耐用,就知我對佢哋嘅愛猶如滔滔江水連綿不絕。但係買咗機之後問題又嚟喇,我有三條友,貼邊個好?貼1個係毒,貼晒3個真係劇毒,我接受唔到……