fbpx
主頁, 動漫資訊, 潮玩新聞 — 23/04/2012 at 12:00 pm

寫個服字畀肥良!

by

不得不佩服肥良,咁嘅市道都夠薑出本《海洋瘋狂》,一本書,三個古仔三個主筆,仲話甚麼破天荒作品版權收歸主筆所有,袁家寶開心到喺專欄話:「鍾英偉成為港漫史上第一位有漫畫作品版權的港漫編劇,而我和曹志豪亦榮幸成為了港漫第一批有版權的漫畫家。」版權誰屬,老實作為讀者嘅我唔Care,我服嘅,係《海洋瘋狂》夠膽死賣二十個大洋,誠如肥良自己所言──確實Crazy!

我有鋪逢創號刊必買癮,廿蚊就廿蚊,照畀,的上手,都OK墜手喎,原來頭搭尾Total七十頁,抵睇。或者你會話,抵睇唔代表好睇啫,咁我可以答你,論畫質,絕非之前嗰本攞你命三千《飆》可比,我甚至可以講:「喺呢本綜合漫畫裡面連載嘅三個古仔,畫功絕對高水準。」打頭陣有李重豪〈邪狼惡獸〉,公仔順眼面相討好,旁白肥良味好重,「扯旗山般扯旗快樂呀!」與「我會乖乖,油煙出晒街」呢兩句,真係睇到我眼淚水都標;緊接有袁家寶〈疤面戰盔〉,似鬼佬漫畫多過似本地漫畫,你未必Like,但我唔抗拒;壓軸有曹志豪〈死角〉,全黑白稿,線條硬朗唔玩精雕細琢,畫風似日本袋裝漫畫,我更君十粒星推介!第二期,我必撐!

《海洋瘋狂》創刊號$20

 

〈邪狼惡獸〉主角狗毛一貫靚仔,請留意旁白,肥良味好重。

 

〈疤面戰盔〉用色好重,大紅大紫,圖為主角卡朗。

 

〈死角〉全黑白,圖為主角歐陽駿KO對手。