編輯Blog — 12/05/2013 at 5:54 pm

【編輯Blog】Reika:大家真的需要3D手機嗎?

by

最近《華爾街日報》報導,Amazon研發緊手機,其中一款仲會有裸視3D技術,我當堂嚇一跳,之後得啖笑。因為我對3D嘅容忍程度已經到達極限,點解?點解乜嘢都要加3D,乜大家真係覺得普羅大眾咁需要3D技術咩?

 

講返Amazon部電話,據知情者透露,部手機會用眼球追蹤技術,透過眼球轉動進行瀏覽操作,近似Galaxy S4嘅其中一項功能。其實之前都出過好多部3D裸視手機,例如新世紀福音戰士都喺上年推出過,但係網上用家都話會關咗呢個功能,因為實在太攰嘞。

 

記得第一次接觸3D,係喺迪士尼樂院嘅3D影院,當時我真係覺得好神奇,仲好低能咁伸隻手出去摸嗰啲飄出嚟嘅泡泡,喺我印象中,3D係高科技嘅代名詞。鏡頭一轉,十年後任天堂出裸視3D遊戲機3DS,唔駛戴眼鏡都可以睇倒3D。真係好高技術,但試完之後我諗:「點解咁暈嘅?係咪我對眼唔識對焦?」打咗唔夠半個鐘我已經頂唔順要熄咗3D 模式,亦好懷疑究竟有無人真心鐘意開住個3D mode打機?好嘞,咁PS3嘅3D遊戲呢?個芒夠大,係咪好啲呢?相信試過嘅都會知佢好考驗你嘅耳水平衡能力,問過身邊嘅朋友,開住3D玩射擊遊戲,等同喺8號風球坐舢舨,浪到想嘔,點解要作賤自己?

 

 

不過最身受其害都係電影,近年所有大片統統用3D拍攝,我明白,因為電影商先要咁樣先有藉口收你過百蚊嘅票價,但係有無考慮過睇戲嘅觀眾感受?好似Iron Man 3咁,飛嚟飛去爆嚟爆去,我去IMAX挑戰極限,睇完真係暈暈哋兼想嘔,想睇2D版?全港只得偏遠地區有得睇,仲要係得極少場次,觀眾選擇權嚴重被剥削。

 

 

發洩完。希望3D快啲玩完。