主頁, 專題熱話, 影音新聞, 電影 — 12/05/2013 at 9:24 am

12/5一週碟報價:西遊冇得唔買 德州電鋸有超自然現象

by

 

終於睇咗《西遊‧降魔篇》, 成個人舒服晒, 我想講句, 如果大家信二手影評唔買的話, 你就真係非常硬膠! 另外《德州電鋸殺人狂3D》都好搶眼, 女角真係超得, 不過我就睇到一肚火, 呢套戲太殘忍喇! 尤其係對男性觀眾! 我頂你十次! 另外Mastered in 4K美版藍光有兩隻碟返咗……對唔住! 原本應該係有10隻嘅, 不過太好賣喇, DVD Pro現在得返兩隻, 唔理你有冇4K電視, 想睇最靚畫質, 都冇得唔買, 只係$200中, 貴一百幾十, 但係畫質係天泥之別, 俾錢喇喂!

 

先講《西遊‧降魔篇》, 雖然係前傳性質, 故事係講返唐僧點收服沙僧、豬八戒同孫悟空呢幾隻大妖, 不過, 其實可以完全當獨立一套戲睇, 只要你肯放下數邊幕似邊幕, 邊句對白似曾相識, 真心! 緊張位同笑位可以話環環緊扣, 係完全停唔到嗰隻! 收沙僧一幕, 我覺得只係Warm Up前戲, 可以不提! 豬妖一幕, 我覺得武打場面係最正一幕, 老實! 舒琪原本喺我心目中係花瓶, 但今次完全係另一個人, 好有霸氣! 究竟佢食乜嘢大0架, 點解到今日都仲可以咁索嘅?

孫悟空一幕, 有分文戲同打戲兩段, 其實我覺得文戲一段正啲, 由葛行宇演困在五指山下孫悟空, 真係頂你個肺好狠正, 嗰種狗到入骨、西到冇朋友, 每一句對白都係大家日常遇到困難問題時嘅解決方案, 好有參考價值, 所以話要買碟好呢, 有得翻煲嘛, 真係要講句小弟受教了! 至於武戲一段, 羅志祥個空虛公子, 雖然只屬大配角, 但戲份相當搶, 加埋嗰四大美女……真係我都好想擁有! 不過講到要彈嘅, 係廣東話配音有少少唔夾嘴形, 睇完一次想用普通話作原音翻煲, 竟發現只得廣東話一條聲, 我諗普通話版對白會盡好多、原汁原味好多, 哎! 真係想小爆諗出只收錄一條聲軌嗰條友!

《德州電鋸殺人狂3D》我都買咗! 原因係一個, 女主角真係好索! 嗰條腰幼到呢……嗰對……你老闆吖! 講身栽我覺得正過變型金剛女主角, 至於樣貌亦只係稍遜一籌, 買碟一半錢都係投資喺佢身上; 故事都好有創意, 係接住舊版《德州電鋸》, 仲攞佢嘅片尾做開場, 真係相當有諗頭(以下有劇透)!

一開場, 先嚟個德州佬大戰殺人狂, 再嚟個冚包散, 殺人狂之女長大後就成為今集女主角, 當佢知悉自己原來俾人殺咗全家, 佢嘅瘋狂之血就開始喚醒及展開始復仇之路, 最重要係原來電鋸佬竟然亦死唔去, 仲鬼鬼祟祟躲在暗處展開復仇……血與肉大平賣, 係必然! 你問我燢乜!? 女主角雖然床戲、賣肉連場, 南北西東半球童叟無欺, 不過佢件緊身恤衫, 唔知點解就算開晒所有鈕, 都會自動貼肉唔會飛吓飛吓, 係一吓都冇囉! 頂! 拍恐怖片最緊要係唶咩呀!? 合理吖嘛! 咁多超自然現象, 拍鬼片啦你!

Mastered in 4K碟見到有兩隻, 分別係《蜘蛛俠:驚世現新》同《新宇宙威龍》, 其實原理好簡單, 雖然佢都係藍光, 不過母帶係4K片, 所以畫質會俾原母帶係1080p嘅普通藍光碟「利」好多、Detail好多! 好多有4K電視嘅人都見碟即掃, 睇完仲話比普通藍光, 真係睇多咗好多嘢! 如果你部Player有谷上4K功能, 再比較用普通藍光碟玩谷, 可以話兩個唔同層次囉, 真係做到好似4K感覺, 最重要價錢唔貴, $250左右就買起, 乜話!? 你屋企冇4K電視都谷4K Player? 其實都一樣會靚咗好多0架!

其他碟片仲有《捉鬼敢死隊》、《蜘蛛俠》、《的士司機》、《異形侵略戰》、《功夫夢》、《喪爆型警》、《光榮》、《天使與魔鬼》, 不過呢8套暫時賣到斷晒貨, 但據知仍不斷從美國返貨中, 不過每次返少量, 想要就要勤巡舖喇!

 

DVD Pro(2332 6326)
地址: 旺角奶路臣街 6E德發商場地庫B4舖
營業時間 : 1:00pm-10:00pm(公眾假期照常)