主頁, 編輯Blog — 05/05/2013 at 5:30 pm

【編輯Blog】Reika:本週洗版之鴨仔 + Iron Man

by

作為網站工作者,每日都花大量時間上Facebook,好耐無見過咁瘋狂嘅洗版程度,無錯,又係隻鴨仔,佢嘅洗版程度直達恐佈級,令我有啲想遠離facebook。老實,我到而家都未親身去睇鴨,因為喺facebook已經睇到飽晒,而且睇報紙見到迫到插針都唔入,就算隻鴨幾得意我都投降。不過,見到咁多人湧住去睇鴨迫爆尖沙咀、香港旅行社仲搞一日遊鴨團,我覺得真係嘆為觀止,亦引證香港人真係好鍾意一窩鋒去做同一件事,只希望今次唔係幾日貨仔,因為展覽好似仲有一個月有排玩。

估唔倒尖東忌廉哥都去咗玩鴨,哈哈。

 

去IMAX睇Iron Man是常識吧‥‥‥?

講完鴨,輪到講Iron Man,無辦法啦,睇返今個星期GAMEOVER網站,講得最多都係Iron Man,而我今個星期六亦奉獻咗第一次 ─ 去咗IMAX睇3D電影。我覺得今集真係幾好睇,有笑位有感人位,打鬥場面亦有好多,而且主角真係好有型,好睇程度同第一集不相伯仲。唯一要彈係喺IMAX睇戲真係好攰,睇完覺得好暈好肚餓好想嘔。

 

PIZZA HUT煩膠Iron Man抽獎活動

Iron Man嘅影響力延續到星期日,因為今日起身唔想出街,於是決定嗌PIZZA HUT,因為可以分兩餐食!嗌咗蝦哈芝心批套餐,估唔到咁都見倒Iron Man,因為隨盒附送咗一張Iron Man刷刷咭,不過玩落似比人玩多啲,要先上facebook讚好佢個專頁,再將刷刷後嘅編號輸入去pizza hut嘅活動page先可以參加抽奬,雖然大獎係Iron Man一比一半胸像,但麻煩程度真係令人好想放棄。不過令我決定放棄,係因為最尾一個步驟要我輸入姓名、身份證號碼、電話同埋地址,嘩,抽個獎啫,你連我地址都要埋,真係太麻煩,於是我張張咭掉咗落垃圾筒,繼續專心食我件Pizza。