主頁, 潮玩新聞, 玩具資訊 — 24/04/2013 at 11:00 am

本地獵奇 跌打舖潮爆塗鴉 骨頭吊吊揈

by

呢個鐵閘,係唔係型仔都爆先?

有麝自然香?No啦,賣乜都好,呢個世界乜都講包裝,只要個殼夠搶眼就掂,有無內涵係等閒事,呢間「梁能評骨傷科醫療中心」勁呀,裝修完全脫離一般跌打舖模樣,好潮好Cyber,難怪唔少人經過都停低望兩眼。

時間,夜晚十一點幾;地點,長沙灣;人物,剛剛同班Friend打完老邊嘅我行經東京街,忽然被幾盞超強力白光管吸引,夜深人靜成條街都閂晒舖,心諗乜鬼嘢咁倀眼呀?瞄一瞄,搞乜鬼成幅鐵閘畫晒Graffiti咁爆?間舖賣乜?抬頭再望埋招牌,仲爆!「梁能評骨傷科醫療中心」是也!乜家陣啲跌打舖咁型仔嘅咩?塗鴉好配合主題,除營業時間、電話同電郵外,仲畫咗一個藍色人體剪影加白森森脊骨同盆骨,用色大紅大藍,色彩鮮艷,真係潮到無人有!咁都未只呀,門面裝修都好型架,鐵閘右邊有條高過人嘅膠製脊骨,暗示你知呢間係一間跌打舖,閘頂仲吊滿人體骨骼模型,模型上寫「足底筋膜炎」、「腕管綜合症」、「扁平足」同「彈弓指」等等,賣埋廣告講到明畀你知識醫甚麼奇難雜症,唔畀十個叻佢都唔得啦。

地址:長沙灣東京街30號地舖(2361 0622)

望招牌,先知係間跌打舖。

呢條柱,包住一條膠製脊骨,搶眼到暈啦。

骨頭模型吊吊揈,寫埋奇難雜症。

彈弓指同扁平足,佢哋都醫得掂架。