fbpx
主頁, 影音新聞, 電影 — 21/04/2013 at 10:33 am

27/4一週碟報價:《狼的孩子》好殘忍  《女王神劍》阿諾舞劍堅好睇

by

 

今個星期行舖真係要叫救命,冇乜大戲、冇乜重點!希治閣叫做幾大,不過文戲……有興趣可以碌碌;揀咗套韓片《我愛瘋SEX》,仲玩Line……不過點都好,都真係玩得幾癲吓,如果唔係都唔會三級啦,可以一樂!

至於《狼的孩子雨和雪》,雖然盒面寫住《穿越時空的少女》細田守監督,不過絕對唔係細路仔戲(小心!會有劇透!),靚女阿媽同狼人結婚生仔,臨盆時都唔敢去醫院,因為驚真係生咗隻狼出嚟;終於生咗一仔一女,以為係個好字啦,點之狼人老竇話拉柴就拉柴;母兼父職,又要小心昅實兩隻馬騮,唔好失驚無神變隻狼出嚟……辛苦帶大之後,阿仔最後都放唔下野性的心,要返森林做野獸山寨王,阿女就話要做人,仲要嫁個有錢人,東西離散,真心!唔係細路仔睇得明。

個人喜好係復修版《女王神劍》,係阿諾出道早期的成名片之一,對白唔多,只係打打打,而且後生版阿諾,嗰身肌肉真係霸氣得不得了,留意佢舞劍,舊街機《戰斧》,其實同佢差唔多同期,而且仲有抄呢列電影之嫌,經典嘢,冇得唔睇!

 

DVD Pro(2332 6326)
地址: 旺角奶路臣街 6E德發商場地庫B4舖
營業時間 : 1:00pm-10:00pm(公眾假期照常)