主頁, 動漫資訊, 潮玩新聞 — 18/04/2013 at 4:00 pm

梁偉家+戴慶賢《滅絕遊戲》創刊

by

《滅絕遊戲》創刊號$15

梁偉家與戴慶賢聯合製作嘅《滅絕遊戲》擒日創刊,我第一時間買咗本睇睇,雖然唔至於驚為天人,但整體感覺唔錯,睇得出係撚盡十二成功力嘅誠意之作,作為港漫Fans,呢十五蚊唔慳得,我話嘅。

港漫一向以武俠技擊為主流,《滅絕遊戲》都唔例外,不過稍稍走偏鋒,走時空交錯玄幻武俠路線,畫風同之前嗰本《鬼王天弓傳》同出一轍,線條比較散亂,唔玩精雕細琢,改以彩繪營造氣氛,戴慶賢出晒名處理彩稿,呢次又開正佢嗰瓣嘞。故事方面,第二期講乜都大致估到個八九八離十,驚喜度一般,叫做交代得清清楚楚咁啦,我反而想問嘅係,點解主角張道陵會有兩隻獠牙?照計通常奸角先會有呢類吸血殭屍式獠牙,又會咁反傳統嘅?睇埋書尾,仲精彩,估唔到兩位人兄喺行內咁受歡迎,邀請到邱福龍、馬榮成、馮志明、少傑、王澤、余均偉、上官小強、何志文、李志清同黃國興相助畫賀圖。一次過見睇番咁多漫迷家嘅親筆畫,唔知點解,居然有番昔日八九十年嗰種睇港漫Feel,唔知大家又有無呢個感覺呢?點都好,當我賣廣告都好,支持港漫,支持《滅絕遊戲》啦。