fbpx
主頁, 動漫資訊, 潮玩新聞 — 20/04/2012 at 12:00 pm

你係明日漫畫新星?

by

又係想當年,上堂無心機聽書,硬係鍾意喺課本上面畫畫畫,畫乜呀?三皇四小將囉、五魔六冤魂囉,畫得似唔似唔緊要,淨係知畫畫吓時間就好快過。

我手畫就極度不似人形,你手畫又見唔見得人?如果見得人,又有無興趣公諸於世?即係點?即係叫你參賽呀。 2012年第十四屆香港動漫電玩節舉辦嘅「原創漫畫新星大賽」,歡迎三十歲或以下人士參加,分故事漫畫組同四格漫畫組,兩組冠亞季軍各得現金獎$10000、$7000同$3000,所有得獎作品會編印成優秀作品集。錢固然唔係事小,大會幫你出書事大,一個好彩你手畫驚為天人,俾各大漫畫公司睇中,之後入行做助理,再之後升主筆出單行本賣過二十萬,再再之後自立門戶,再再再之後變成另一個畫壇巨人黃玉郎,再再再再之後……真係學周星馳話齋:「掂呀。」發夢之前,請瀏覽www.ani-com.hk下載參賽表格,截止日期2012年5月31日6:00pm,想做明日漫畫之星,報名要快。