主頁, 動漫資訊, 潮玩新聞 — 13/10/2023 at 1:38 am

為鬧而鬧? 《新著龍虎門》2500期封面何罪之有?

by

鄺彬強《新著龍虎門》來到2500期了,無論鍾唔鍾意呢本書都好,始終都係一個值得高興嘅里程碑,但觀乎各大中小討論區同面書專頁,我發覺贈興者極少,嘲笑者極極極極極極極多,嘲乜?嘲個龍虎三皇打手勢做「2500」嘅封面,甚麼——「好核突。」、「懶風趣。」、「好老土」、「隻手畫到唔知想點。」、「BL三皇」諸如此類。呢個封面真係咁肉酸咩?個人認為,橫睇掂睇都不但合格有餘,仲幾靚幾搶眼添⋯⋯

世界好奇妙,有啲讀者好鍾意乜都鬧一餐,奇在期期搵嘢鬧又期期Keep住睇喎,照計講到本書咁差應該棄書喇,但又唔棄喎,究竟為乜呢?今次鬧到連封面都唔放過,會唔會無嘢搵嘢鬧咗啲呢?打手勢好柒?期期畫主角齋戙企擺Pose又嫌悶,家陣做個手勢食番「2500」主題又嫌三嫌四寸人懶風趣,都幾難服侍喎。BL?睇幾廿年書,不嬲《龍虎門》無論正傳外傳乜傳物傳都係以男主角掛帥,十個高手八個係男,打來打去打足咁多年都仲未慣?依家先寸人BL,B乜L呢請問?為鬧而鬧雞蛋挑骨頭邊個唔識?問題係,可唔可以鬧得有Point少少?
或問,睇公仔書初心係乜?想睇得開心嘛,娛樂之一嘛,睇到咁激心,睇到連封面都礙你眼的話,咁何苦仲要睇呢?
講真,要鬧應該係鬧唔知講緊乜嘅暴走劇情,馬小靈居然練毒、十戰無厘頭要滅龍虎門、白朗無端端同天網扯上關係但又唔交代乜關係就死咗、白無涯忽然販毒變奸、石黑龍同鐵五郎唔記得老豆點死忽然變Friend、龍天下約東方無敵出嚟食Tea唔知為乜、吞天鬼忍刀魂三個小丑話死就死、武當罪人唔知邊個係罪人、邪王又離火又玄冰煩到一個點、天網講咗咁多期都仲未知係個乜嘢組織,今期阿天下無敵仲同疑似龍九州拼掌添,唔係Crossover《如來神掌》嘛?究竟幾時先可以收老祖宗皮?唔再講天牢?繼續出老祖宗只會繼續崩壞《龍虎門》世界觀同武功秩序,唔好再咁喇好無?
於我,真心,封面無問題,畫功亦收貨。
只遺憾,劇情痴線地爛並繼續爛;旁白同對白九唔搭八,明粒粒中文字,但砌埋一齊睇唔明。
惟望,可以請番個正常少少嘅編劇幫幫手,係,唔奢求有乜轟天動地出類拔萃估你唔到無限扭橋嘅劇情,正正常常就夠了。
鄺彬強,你明白嗎?
加油。

「小靈可以為王小虎包攬天下奇毒尚嫌不足……」呢段字究竟講乜?跟著又點解可以跳到落結論「無敵……是愛啊!」天呀,我究竟睇咗啲乜?

 

連疑似龍九州都出場?唔好嘞啩?

 

「在天牢可享永恒的生命,但死去的人卻例外。」、「天牢也存在死亡。」呢兩段旁白,我睇到呆咗,即係點?想點啫究竟?既云永恒生命又何死之有呀?