主頁, 動漫資訊, 潮玩新聞 — 28/09/2023 at 11:44 pm

《新著龍虎門》總2500期慶典 龍喜卡+角色立牌+海報

by

仲有兩期《新著龍虎門》就會踏入總2500期(新著1220期),咁話晒都係一個里程碑,搞番啲慶典活動唔過份。活動一,由1220期開始,普及版連續18期送龍喜卡,每期隨機送兩款,Total有36張,即係博你每期買兩本囉;活動二,限量立牌版$78,隨書送栢迪《龍虎門GO!!》角色立牌一個,由1220期開始至1223期止,先後推出角色為王小虎、石黑龍、王小龍同王風雷,四個角色我都鍾意,想要晒;活動三,《龍虎門》經典降龍十八腿海報限量立牌特別版第一彈,即係估計仲有二三四五六七彈,暫時未有定案。係呀,呢啲絕對係消費死忠嘅操作,估計唔會對升書有好大幫助,但一日死忠一世死忠,我點都係舉腳支持嘅。惟望鄺彬強可以搞番好本書,等我可以撐得再心甘情願啲。