主頁, 動漫資訊, 潮玩新聞 — 29/05/2023 at 5:12 pm

《新著龍虎門》1200期封面無氣勢 一連三期送Postcard

by

《新著龍虎門》來到1200期,無乜特別大鑼大鼓祝活動,簡簡單單送吓PostCard咁囉。嚟緊1200至1202期一連三期,分別會隨書附送普及版2款同書屋版1款Postcard,Total有9款,儲齊9款反轉背面可以合併成一幅大圖,都係博讀者買多幾個版本嘅伎倆,OK我接受喇。要彈嘅反而係,作為里程碑嘅1200期,個封面好似削咗啲喎。唔係畫得唔靚呀,而係無氣氛無氣勢囉,龍虎三皇加韋陀加王小鷹加王風雷加白仇各自擺Pose戙企,彼此零聯繫,係重新畫定用舊圖退地我唔敢肯定呀,但如此這般配個大紅底色封面就交貨,感覺係無乜點諗過,求求其其了事。Anyway,再講多句,作為死忠,封面都好小事,最緊要劇情,拜托,如果嚟緊故事走向可以「合理」番少少,我已經心滿意足了。鄺彬強,加油呀。