主頁, 動漫資訊, 潮玩新聞 — 27/03/2023 at 4:23 pm

袁家寶《刀劍問乾坤》講公義? 唔識欣賞合併封面

by

好喇,睇完袁家寶《刀劍問乾坤》,短短哋四期完,我畀90分,作為四期短篇,由淫娃公主揚眉濫殺開始,到公主俾北霸武尊一錘揼到變屎餅作結,故事完整有頭有尾,每個角色都有合理發揮空間,合格有餘。不過個合併封面呢,就……唔識講,唔知想點咁囉,唔知其他師兄點睇喇,我就唔多識欣賞喇,扣嗰10分,好大程度上係因為呢個封面。

想講少少讀後感,唔知有無Get錯,我覺得《刀劍問乾坤》係非一般打書,或者咁講,想以打書套路帶出一啲Message,主題係「公義」,講唔同立場崗位身份嘅人喺生死關頭如何抉擇公義。西野女帝都知個女衰咗,自認「教女無方」,但骨肉親情下點都唔肯大義滅親,希望息事寧人「就此打住」;揚眉就係一級仆街,視公義如無物,一甩身就反過來叫北霸武尊殺死對方,一錯再錯喪盡天良;申慎之既為西野捕快,職責所在要營救公主,但心知公主唔係好人,所以放水畀吾道刀者挾持公主去東邦受審,希望勉勉強強做到「忠義兩存」;吾道刀者就簡單得多,為公義守護弱者,拼死都要還圖老實一個公道;圖老實就係押注世間尚有公義,所以先唔自殺,不過Last都有向現實低頭嘅一刻。而最終結局係公主伏誅,但又代唔代表公義得到彰顯呢?睇落係,但No囉,因為呢種「公義」係強權一錘定音嘅,北帝係強權,強權畀嘅公義係咪真正公義呢?

扯遠咗,講番個合併封面,第三期一大Pet紅色加一個角色剪影喺左上,第四期都係一大Pet紅色加一個角色剪影擺喺右下角,如此這般合併埋,問心,其實想代表乜呢?睇唔透。我從來唔向壞處想,我唔會估因為偷懶,唔會估因為諗唔到畫乜,所以先整咗兩期疑似倒瀉紅色墨水嘅封面出嚟。我估袁家寶係想來一個新嘗試,想破格啲,但實情係……不喜勿插呀,眼高手低了一點點,出來嘅效果係不倫不類、不三不四,令人不知所措,不明所以。

點都好喇,以全新創作故事嚟講,呢四期書我係睇得好暢快嘅,書末話會有全新篇章,都係四期完,四月出版,我舉腳贊成,畢竟好多角色同情節都未講盡,For example,隻功夫熊貓阿爺究竟係人扮定真係熊貓?吾道刀者真身係點?北霸武尊同韓鞅有乜淵源?齊天又點覆灼申慎之同吾道刀者?好多嘢可以繼續寫落去。袁家寶,加油呀。

 

第三期有事先張揚搞合併封面,但出來效果好強差人意吓。

 

再出落去的話,我會繼續捧場。

 

北霸武尊一錘定音,揼扁公主。

 

有機會係我睇漏,究竟阿爺係真熊貓定人扮熊貓?

 

圖老實唔只老實,仲係個大好人,臨尾諗住犧牲自己,保住眾人性命。

 

公主揚眉無俾天收,俾強權北霸武尊收佢皮。

 

兩大主角吾道刀者同申慎之,仲有好多發揮空間。