主頁, 動漫資訊, 潮玩新聞 — 26/02/2023 at 12:17 am

讀後感:袁家寶《刀劍問乾坤》創刊 四期完撐到底

by

一來驚劇透喇,二來真係去到今日先真真正正有時間,舒舒服服坐茶餐廳慢慢煲袁家寶新作《刀劍問乾坤》。有啲讀後感想講吓,書名「刀劍問乾坤」五粒字,我覺得係寫得好靚嘅,有氣勢,夠搶眼,但係呢,就搶眼過封面主體構圖,成個封面太黑蚊蚊了,主角申慎之笠住頂帽見唔到樣,另一主角吾道刀者黑到幾乎只見剪影,唔見細節,感覺係怪,擺喺報紙檔亦唔起眼……

故事呢,正常套路囉,創刊號先設定三股勢力分天下,都係預咗三方打來打去。故事由一個淫娃公主揚眉濫殺無辜作始,算有啲新意。唔知大家有無發覺,揚眉面相有啲似鄭健和《妖怪道》裡面嘅九尾狐?畫工方面,不過不失,唔會有好多打網呀多餘線條呀之類,簡潔,乾淨,睇得舒服,網上唔少師兄話吾道刀者造型一身盔甲,圓碌碌好醜樣,唔知點解我又唔覺喎,新嘗試都係一件好事,下下都畫到主角型英帥靚正咁大路,邊有癮架?仲有隻熊貓呀,古裝打書出隻熊貓,都幾搞笑。But呢,大大格情況都好誇張吓,第四頁齋畫兩條女,無景嘅,第五頁西野女帝大大大大大頭就咁佔咗一頁,有啲唔係咁好囉。

講多樣嘢,上期睇《新著中華英雄》賣廣告,話《刀劍問乾坤》創刊會隨書奉送《SNK格鬥世代》,結果呢?居然甩轆!創刊號書末有講番會「暫定改於下期附奉,最新消息請密切留意本公司FB專頁」,而Art Comics Studio Limited亦喺面書交代番「現延期一週附送 ,深感抱歉!」喂,話晒買一送一,斷估呢個都算係賣點啩,賣點都居然可以甩拖,實在係說不過去,希望有關方面可以把關得好啲喇。As a conclusion,講明四期完,港漫始終係我所愛,我會撐到底,呢一舊水,科硬。

《刀劍問乾坤》創刊號

 

本來話隨書附送嘅《SNK格鬥世代》,今期無影。

 

西野公主揚眉,面相係咪有啲似《妖怪道》九尾狐?

 

一個大頭佔一整頁,唔係咁好囉。

 

吾道刀者一身盔甲,我接受到。

 

主角申慎之,造型普通咗啲。

 

功夫熊貓?過癮喎。,