fbpx
主頁, 動漫資訊, 潮玩新聞 — 07/10/2021 at 11:45 pm

《王小龍傳貳》好多Bug 連「下期預告」都出錯

by

作為一個死忠港漫迷,我甚少投訴,但今期第28期《王小龍傳貳》實在有點不敢恭維。唔知係咪年紀大咗眼水無咁多,硬係覺得成期書都濛查查,線條好唔實淨,分色又偏暗啞,每格畫面都有啲凌亂污穢感。人物面相亦唔掂,有幾格玉兒同王小龍一孖眼珠好似唔係望住同一方向,有一格阿谷次郎直頭畫到高低大細眼添。今期Bug都有唔少,東野庸子同王苦海情侶互動無疑幾有趣,但第7頁尾二嗰格出事,「夠喇,咪痴住晒。」出自王苦海把口無錯,但頭髮分錯色,變成好似東野庸子講緊嘢咁;第9頁旁白寫「……小龍的一席話,教王苦海不禁熱淚盈眶。」但阿王苦海就畫到兩隻眼碌到大一大,一副驚愕表情,眼淚都唔見多滴,何來熱淚盈眶?第27頁都出事,旁白係咁寫:「神秘人右腳一屈一舒,如雷吞吐……」但畫面所見,阿神秘人係用左腳踢王小龍的;最最最最離譜係書末「下期預告」有這麼的兩句──「救世主彌賽亞終極夢想展現,拯救世人同時製造滅世巨」,滅世巨「乜」呢?無句號嘅?唔係嘛,居然寫寫吓斷咗,好明顯係就圖擺位走唔晒啲字,喂呀,內文構圖就話一個不小心容易走漏眼啫,要幾千多億個不小心,先可以令簡單如齋text都可以咁錯法?唉,雖然暫時我仲未有棄書念頭,但說實在,係睇到有啲無奈、氣餒、無癮。

真係Could anybody tell me?谷次郎對眼想點?

 

對白無錯,但髮色撈亂咗囉。

 

唔係挑剔,有邊忽「熱淚盈眶」?我淨係見到王苦海對眼碌到好大,但唔知佢望緊乜。

 

留意吓阿神秘人髮根同鬚根,啲分色起晒角,求其到呢。

 

明明出左腳狂踢,又寫話出右腳。

 

唔想特登捉錯處,但居然連字都未走晒,好明顯無double check,實在離譜。