fbpx
主頁, 動漫資訊, 潮玩新聞 — 07/10/2021 at 10:45 pm

鄺彬強出精采截圖 你今日買咗《新著龍虎門》未?

by

瘋狂洗版,有Noise有Voice,易手後由鄺彬強扯頭纜嘅第1118期《新著龍虎門》係今日港漫界焦點,睇留言九成九都係讚,總算開到個靚頭,恭喜恭喜。我當然有買書喇,嗱,呢個Post啲截圖係出自鄺彬強面書,我無劇透呀……不過都忍唔住講少少,王小虎喺八號風球下用降龍十八腿力戰嘍囉,一招一式有板有眼,呢種招接招一氣呵成嘅感覺真係久違了,呢啲先係格與格之間、每個肢體動作都有關連嘅真正「連環圖」吖嘛。唔係講笑,我係睇得好開心的,仲翻睇咗兩次,都唔知幾多年未試過同一本港漫睇三次了。睇公仔書求開心,我想個個禮拜都咁開心,希望鄺彬強嘅製作團隊可以撚盡十二成功力,唔好再玩無厘頭死而復生、唔好無端端整死重要主角、唔好有爺孫戀、唔好再提飛昇甚至唔好再出老祖宗,回饋我等仍真金白銀買實體港漫嘅港迷漫喇。

資料來源:https://www.facebook.com/kongbunkeung