fbpx
主頁, 動漫資訊, 潮玩新聞 — 31/05/2021 at 4:15 pm

《新著龍虎門》靠塊超陰牌嚇鬼? 點解石黑龍又學埋易筋經?

by

繼續真金白銀撐《新著龍虎門》1099期,繼續睇到滿不是味兒。蚩尤尾七都過咗,可唔可以唔好再消費佢呢?嗰塊疑似有佢嘜頭嘅甚麼超陰牌真係咁嚇鬼?居然可以嚇到王小鷹、翼龍、銀玲、伊賀愛同通天教班嘍囉心都寒埋,乜家陣啲所謂高手咁心靈脆弱的嗎?堂堂石黑龍會驚件死物「元始魂奴」?究竟我係咪睇緊《怪異集》?隻揪就堂堂正正隻揪,搞埋呢啲神神怪怪托咩?另,我懇請編劇們,可唔可以唔好再破壞《龍虎門》武學觀,石黑龍無端端識盤古天殛震已經好離譜,打打吓仲識埋易筋經,痴線的嗎?白朗又係,頂吖,處於下風嘅佢又無端端有道經加持伏羲問天錄。編劇大人,係咪打算每出多一期書主角們就自動識多一種武功?仲要唔使練嘅喎,快過三分鐘叮一個杯麵,用一兩格加三兩句旁白就當交代咗㗎咯喎,乜家陣啲絕頂武功咁易練嘅咩?咁不如全世界都學晒無相神功喇,仲打嚟打去把鬼咩?

打到無嘢好打,攞塊超陰牌出嚟打,有無搞錯?一眾高手們使唔使驚成咁呀?

 

 

石黑龍點解要識藍易筋經?無易筋經就打唔贏白朗?

 

睇完呢一格,我唉咗出來。

 

噓,熱鬧啲,白朗又識道經,吹咩?吹你唔脹囉。

 

正正經經隻揪唔得嘅,係要搞埋啲邪邪怪怪嘢,何苦呢?